Իսրայելի և Սիրիայի միջև բանակցությունները մոտ են ավարտին․ «Ալ Արաբիա»

Ամիսներ տևած դիվանագիտական ​​ջանքերից հետո Իսրայելի և Սիրիայի միջև բանակցությունները շարունակվում են և մոտենում են ավարտին: Այս մասին հայտնել է «Ալ Արաբիա»-ի աղբյուրը՝ հավելելով, որ Իսրայելը Միացյալ Նահանգներին և Սիրիային ասել է, որ չի աջակցում Սիրիայի անջատման կոչերին։

Աղբյուրի խոսքով՝ Իսրայելը վստահեցրել է Միացյալ Նահանգներին, որ չի աջակցում Սիրիայի դրուզների առաջնորդ Հիքմաթ ալ-Հիջրիին կամ Ալ-Սուեյդայի որևէ այլ գործչի։

Սիրիայի հարավում գտնվող դրուզների ականավոր առաջնորդ ալ-Հիջրին նախկինում պաշտպանում էր իր համայնքի համար առանձին շրջանի ստեղծումը՝ Դամասկոսի հետ լարվածության ֆոնին: Լարվածությունը սրվեց Ալ-Սուվեյդա նահանգում մի քանի ամիս առաջ տեղի ունեցած արյունահեղությունից հետո, երբ բախումներ տեղի ունեցան դրուզ զինյալների և սուննի բեդվինների միջև։ Միջադեպը սրվեց, երբ իրավիճակին խառնվեցին կառավարական ուժերը և զինված խմբավորումներ՝ Սիրիայի այլ մշրջաններից:

Այդ ժամանակ Իսրայելը միջամտեց՝ իրականացնելով օդային հարվածներ, որոնք, ինչպես նա պնդում էր, ուղղված էին դրուզներին աջակցելուն։ Աղբյուրը նշել է, որ Իսրայելից դեպի Ալ-Սուվեյդա մարդասիրական միջանցք ստեղծելու գաղափարը չի քննարկվում։ ԱՄՆ ծրագրի համաձայն՝ այդ միջանցքը կձգվի Դամասկոսից։

Սիրիայի և Իսրայելի միջև անվտանգության պայմանագիր կնքելու նախորդ ջանքերը, ըստ բանակցություններին ծանոթ չորս աղբյուրների, խոչընդոտի են բախվել Իսրայելի կողմից Ալ-Սուվեյդա մարդասիրական միջանցքի պահանջի պատճառով։

Աղբյուրի խոսքով՝ նոր համաձայնագիրը նման է 1974 թվականի համաձայնագրին՝ աննշան փոփոխություններով, և նախատեսում է իսրայելա-սիրիա-ամերիկյան համատեղ ներկայություն որոշակի վայրերում, այդ թվում՝ Հերմոն լեռան վրա։

Սիրիայի կառավարությունը խոստացել է ԱՄՆ-ին, որ չի վնասի դրուզ համայնքին և Ալ-Սուվեյդա նահանգին կապահովի անհրաժեշտ ապրանքներով, աշխատատեղերով և աշխատավարձերով։

Միևնույն ժամանակ, աղբյուրը նշել է, որ ԱՄՆ-ն Իսրայելին տեղեկացրել է, որ մինչև հաջորդ տարվա սկիզբը պետք է լուծի Սիրիայի հարավի հարցը և սիրիական նոր կառավարության հետ իր հարաբերությունները։

Աղբյուրի փոխանցմամբ՝ երկու երկրների սահմանի երկայնքով զարգացումները վերահսկելու համար կստեղծվի սիրիա-ամերիկա-իսրայելական համատեղ անվտանգության կոմիտե։