Նոյեմբերի 10-ին ՀՀ ԱԳ նախարարի տեղակալ Վահան Կոստանյանն ընդունել է Հայաստանի Հանրապետությունում հավատարմագրված Եվրոպական միության պատվիրակության և ԵՄ անդամ երկրների դիվանագիտական ներկայացուցչությունների ղեկավարներին։ Հայտնում է ՀՀ ԱԳՆ-ն:
Հանդիպման ընթացքում քննարկվել են Հայաստանի և Եվրոպական միության, ինչպես նաև Հայաստանի և ԵՄ անդամ երկրների միջև ընդլայնվող երկկողմ օրակարգին առնչվող մի շարք հարցեր, վիզաների ազատականացման գործընթացի շրջանակներում տեղի ունեցած զարգացումները, մասնավորապես՝ ՀՀ-ԵՄ վիզաների ազատականացման գործողությունների ծրագրի` հնարավորինս սեղմ ժամկետներում իրականացումը:
Գործընկերներին են ներկայացվել Երևանում հաջորդ տարի սպասվող Եվրոպական քաղաքական համայնքի ութերորդ գագաթնաժողովին առնչվող բովանդակային մանրամասներ: Շեշտվել է Հայաստանի պատրաստակամությունը պահպանել ներառականության սկզբունքը՝ գագաթնաժողովին հրավիրելով ԵՔՀ բոլոր մասնակից պետություններին:
Անդրադարձ է կատարվել Հայաստանի և Ադրբեջանի միջև օգոստոսի 8-ին Վաշինգտոնում ձեռք բերված պայմանավորվածություններին, ինչպես նաև Հայաստան-Թուրքիա հարաբերությունների կարգավորման գործընթացին:
Հետևեք մեզ տելեգրամում
