Իրանցի հայտնի կինոռեժիսոր Ջաֆար Փանահին դատապարտվել է մեկ տարվա ազատազրկման

Իրանցի հայտնի կինոռեժիսոր Ջաֆար Փանահին հեռակա կարգով դատապարտվել է 1 տարվա ազատազրկման և 2 տարվա երկրից դուրս գալու արգելքի: Այս մասին հայտնում է իրանական ISNA լրատվական գործակալությունը:

Փանահին մեղադրվում է իսլամական համակարգի դեմ քարոզչություն անելու մեջ: Նա նախկինում ևս դատապարտված է եղել, իսկ այժմ իր վերջին ֆիլմի ցուցադրության նպատակով Իրանից դուրս է գտնվում:

Նշենք, որ Ջաֆար Փանահիի «Պարզ պատահար» ֆիլմն այս տարի արժանացել էր Կաննի կինոփառատոնի գլխավոր մրցանակին՝ «Ոսկե արմավենու» ճյուղի։ «Ոսկե ծիրան» միջազգային փառատոնի շրջանակներում նա նաև Հայաստան էր այցելել: