Սիրիայում հիմնադրվել է «Հայկական միասնություն» կուսակցությունը։ Այն իր հիմնադիր համաժողովն անցկացրել է Սիրիայի Հասաքե քաղաքում: Համաժողովի ժամանակ հայտարարվել է, որ հայերը փոքրամասնություն չեն, այլ կազմում են սիրիական հասարակության անբաժանելի մասը և պահանջվել են սահմանադրական երաշխիքներ ինքնության և հայոց լեզվի համար, ինչպես նաև կարևորվել է ներկայացվածության երաշխիքը հաստատություններում՝ որպես երկրի ապագան ձևավորող կարևոր գործընկեր։
Համաժողովում Իմադ Թեթրիյանը ընտրվել է կուսակցության գլխավոր քարտուղարի պաշտոնում: Նա նշել է, որ հայերը պետք է ներկայացված լինեն Սիրիայում, բոլոր կրոնների միջև պետք է համագործակցությունն ամրապնդվի, պետք է աշխատանքներ տարվեն հայկական ազգային և մշակութային ինքնության վերականգնման ուղղությամբ։ Նա նաև նշել է, որ արտասահմանյան հայկական կուսակցությունների հետ հաղորդակցման կամուրջներ պետք է ստեղծվեն, պետք է ամրապնդվեն տարածաշրջանի ժողովրդավարական ուժերի հետ հարաբերությունները և համագործակցեն փոքրամասնությունների պաշտպանությամբ զբաղվող միջազգային հաստատությունների հետ։
Համաժողովին ելույթ է ունեցել նաև հայկական Կաթոլիկ Սուրբ եկեղեցու քահանա Հայր Նուբար Մելքոնյանը: Ըստ նրա՝ պետք է լինի այնպիսի Սիրիա, որտեղ երաշխավորված կլինեն հայ ժողովրդի ժառանգությունը և բոլոր սիրիացիների իրավունքները։
Հետևեք մեզ տելեգրամում
