Սիրիայի անցումային կառավարության արտաքին գործերի նախարար Ասաադ ալ-Շեյբանին և պաշտպանության նախարար Մուրհաֆ Աբու Կասրան հանդիպում են ունեցել ՌԴ նախագահ Վլադիմիր Պուտինի հետ, քննարկել երկկողմ ռազմատեխնիկական համագործակցության զարգացման ուղիները։ Այս մասին տեղեկացնում է TASS-ը՝ հղում անելով սիրիական SANA պետական գործակալությունը:
Հանդիպման ընթացքում ընդգծվել է, որ Ռուսաստանի հետ պաշտպանության ոլորտում համագործակցությունը նպատակ ունի նպաստել Սիրիայում և ողջ Մերձավոր Արևելքում անվտանգության ու կայունության ամրապնդմանը։ Քննարկվել են Սիրիայի բանակի պաշտպանունակության բարձրացման հարցեր՝ ռազմական տեխնիկայի արդիականացման, ժամանակակից լուծումների ներդրման և ռազմատեխնիկական փորձի փոխանցման միջոցով։
SANA-ի հաղորդմամբ՝ առանձնահատուկ շեշտ է դրվել ռազմաարդյունաբերական ոլորտում համագործակցության ռազմավարական բնույթի վրա։ Բացի այդ, կողմերը անդրադարձել են տարածաշրջանային և միջազգային վերջին զարգացումներին, ընդգծել միջազգային հարթակներում Դամասկոսի և Մոսկվայի միջև քաղաքական ու դիվանագիտական համակարգման կարևորությունը։
Հանդիպման օրակարգում ընդգրկված են եղել նաև առևտրատնտեսական կապերի ընդլայնման հեռանկարները, տնտեսական ենթակառուցվածքների վերականգնման և զարգացման ծրագրերը, ինչպես նաև Սիրիայում ներդրումների ներգրավման հնարավորությունները։ Ըստ հաղորդագրության՝ Ռուսաստանի հետ երկկողմ առևտրի և գործընկերային հարաբերությունների զարգացումը կարող է դրական ազդեցություն ունենալ Սիրիայի տնտեսության վրա և նպաստել բնակչության կենսամակարդակի բարձրացմանը։
Ռուսական կողմը հանդիպման մասին առայժմ պաշտոնական հաղորդագրություն չի տարածել:
Հետևեք մեզ տելեգրամում
