Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Իրանի նախագահ Մասուդ Փեզեշքիանի հետ։ Թուրքիայի նախագահականի հանրային կապերի վարչության տարածած հաղորդագրության համաձայն՝ նախագահները քննարկել են Թուրքիա-Իրան երկկողմ հարաբերությունները և տարածաշրջանային հարցեր։
Զրույցի ընթացքում Էրդողանը հայտնել է, որ ուշադիր հետևում է Իրանում տեղի ունեցող իրադարձություններին և Թուրքիան կարևորում է Իրանի խաղաղությունն ու կայունությունը։ Նա նաև հավելել է, որ Թուրքիան երբեք դրական չի վերաբերվել Իրանի գործերին արտաքին միջամտության որևէ սցենարի։
Էրդողանն ընդգծել է, որ տարածաշրջանում խնդիրների լուծումը և լարվածության սրման կանխումը նույնպես բխում են Թուրքիայի շահերից։
Իրանական կողմն էլ շել է, որ Փեզեշքիանը շնորհակալություն է հայտնել Իսլամական Հանրապետությանն աջակցելու Թուրքիայի դիրքորոշման համար և ներկայացրել, թե ինչ է կատարվել Իրանում: Նա նշել է, որ բողոքի ակցիաները սկզբում խաղաղ են եղել, սակայն հետո դրանց ներգրավվել են հատուկ պատրաստություն անցած ահաբեկիչներ, որոնք վայլել են ԱՄՆ և Իսրայելի ուղիղ աջակցությունը, և ցույցերն այլ բնույթ են ստացել:
Իրանի նախագահը վստահություն է հայտնել, որ իսլամական աշխարհի երկրների միասնության, համախմբվածության և համագործակցության, ինչպես նաև ահաբեկչության դեմ պայքարի ու համատեղ ջանքերի շնորհիվ տարածաշրջանը կշարժվի խաղաղության, կայունության և տևական անվտանգության ուղղությամբ։ Փեզեշքիանը, անդրադառնալով Իրանի և Թուրքիայի միջև հարաբերությունների բարձր և չափազանց գոհացուցիչ մակարդակին, նշել է, որ երկու երկրների հարաբերությունները գտնվում են շատ լավ ուղու վրա, և իրենք վճռական են ավելի զարգացնել և ամրապնդել երկկողմ հարաբերությունները։
Նա ընդգծել է, որ Իրան-Թուրքիա համագործակցության գերագույն խորհրդի 9-րդ նիստի անցկացման համար սպասում են Էրդողանի Թեհրան այցին: Էրդողանը ցավակցություն է հայտնել զոհերի կապակցությամբ և նշել, որ Իրանում խաղաղությունը, կայունությունը և անվտանգությունը Թուրքիայի համար շատ կարևոր է: «Մենք մշտապես անընդունելի ենք համարել Իրանի Իսլամական Հանրապետության դեմ միջամտողական սցենարները և այսօր ևս դրանք բացահայտորեն դատապարտում ու մերժում ենք»,-նշել է Էրդողանը։
Հետևեք մեզ տելեգրամում
