Եվրոպայի հայ դատի գրասենյակը (EAFJD) խորը մտահոգություն է հայտնել Հալեպում, ինչպես նաև Սիրիայի հյուսիսային և հյուսիսարևելյան շրջաններում լարվածության սրման կապակցությամբ՝ ընդգծելով Թուրքիայի խաթարիչ դերակատարումը տարածաշրջանում։
Կազմակերպության տարածած հայտարարության մեջ Եվրոպայի Հայ դատի գրասենյակի պատասխանատու Գասպար Կարապետյանը զգուշացրել է, որ Թուրքիայի գործողությունները խոչընդոտում են Սիրիայում ազգային համախմբվածության վերականգնմանն ուղղված ջանքերին՝ երկիրը պահելով շարունակական անկայունության մեջ և շարունակելով միջամտել նրա ներքին գործերին։ Վերջին շրջանում պետական ուժերի և քրդական ստորաբաժանումների միջև տեղի ունեցած զինված բախումները ավելի են սրել իրավիճակը։
«Վերջին շրջանում Հալեպը, մասնավորապես Սիրիայի հյուսիսային և հյուսիսարևելյան հատվածները, հայտնվել են լարվածության բարձր աստիճանի պայմաններում, այդ թվում՝ պետական ուժերի և քրդական ստորաբաժանումների միջև զինված բախումների ֆոնին։ Ներքին համախմբվածության վերականգնման ջանքերը՝ որպես ազգային միասնության կարևոր ազդակ, խոչընդոտվում են Թուրքիայի կողմից, որը սեփական շահերից ելնելով ձգտում է Սիրիան պահել մշտական անկայունության մեջ», – հայտնել է Կարապետյանը։
Հայտարարության մեջ կազմակերպությունը կոչ է արել հակամարտության բոլոր կողմերին հրաժարվել սպառնալիքներից ու ուժի կիրառման մարտավարությունից՝ դրա փոխարեն որդեգրելով կառուցողական երկխոսություն՝ ի նպաստ Սիրիայի բոլոր քաղաքացիների քաղաքացիական և մշակութային հավասար իրավունքների հաստատման։ Կարապետյանը նաև շեշտել է, որ որոշ դրական քայլեր արդեն արվել են, սակայն կարևոր է դրանք ամբողջությամբ իրագործել և խուսափել զինված բախումներով հակասությունների լուծման գայթակղությունից։
«Կառուցողական երկխոսությունը, քաղաքացիական իրավունքների հարգումն ու միջազգային նորմերի պահպանումը Սիրիայում կայուն խաղաղության հասնելու միակ ճանապարհն են», – եզրափակել է նա։
Հետևեք մեզ տելեգրամում
