Իրանի Իսլամական Հանրապետության խորհրդարանում Թեհրանի պատգամավոր Սոմայե Ռաֆիին հայտարարել է, որ օրենսդիրները մշակում են մի նախագիծ, որով նախատեսվում է տուրքեր և հարկեր գանձել Հորմուզի նեղուցով անցնող օտարերկրյա նավերից։ Այս մասին հայտնում է իրանական «Թասնիմ» գործակալությունը։
Ըստ պատգամավորի՝ նախագծի հիմքում ընկած է այն գաղափարը, որ քանի որ Իրանն է ապահովում նեղուցի անվտանգությունը, ապա այն որպես տարանցիկ ուղի օգտագործող երկրները պետք է վճարեն դրա դիմաց։
«Խորհրդարանականները հետամուտ են մի նախագծի, համաձայն որի՝ եթե Հորմուզի նեղուցն օգտագործվի որպես անվտանգ ուղի նավերի տեղաշարժի, էներգակիրների փոխադրման և պարենային անվտանգության համար, ապա երկրները պարտավոր կլինեն տուրքեր և հարկեր վճարել Իրանին»,- նշել է Ռաֆիին։ Նա ընդգծել է, որ տարածաշրջանային անվտանգությունը հաստատվելու է Իրանի «հզորությամբ և փառքով», իսկ մյուս պետությունները պետք է վճարեն այսպես կոչված «անվտանգության հարկ»։
Անդրադառնալով տարածաշրջանային լարվածությանը՝ Ռաֆիին վստահություն է հայտնել Իրանի ռազմաքաղաքական հաղթանակի նկատմամբ։ Նա շեշտել է, որ Թեհրանի հզորացումն անընդունելի է թշնամիների համար, սակայն դա «իրողություն է, որին նրանք ստիպված են հարմարվել»։
Պատգամավորը նաև հավելել է, որ անկախ հետագա զարգացումներից, Հորմուզի նեղուցով թշնամական երկրների նավերի անցումը շարունակելու է մնալ բարդ և «մարտահրավերներով լի»։
Հետևեք մեզ տելեգրամում
