Իրանի արտաքին գործերի նախարարությունը հերքել է ԱՄՆ նախագահ Դոնալդ Թրամփի հայտարարություններն այն մասին, թե Թեհրանի և Վաշինգտոնի միջև Մերձավոր Արևելքում իրավիճակի կարգավորման շուրջ բանակցություններ են ընթանում։ Իրանական դիվանագիտական գերատեսչությունը շեշտել է, որ որևէ երկխոսություն կողմերի միջև չի ընթանում:
Ըստ Թեհրանի պարզաբանման՝ Թրամփի նմանատիպ հայտարարությունները հետապնդում են բացառապես քաղաքական և տնտեսական նպատակներ։ Մասնավորապես, Իրանի ԱԳՆ-ն նշել է, որ ԱՄՆ նախագահը փորձում է արհեստականորեն նվազեցնել համաշխարհային շուկայում էներգակիրների գները և ժամանակ շահել սեփական ռազմական ծրագրերն իրականացնելու համար։
Ավելի վաղ Դոնալդ Թրամփը Truth Social ցանցում հայտնել էր, թե վերջին երկու օրվա ընթացքում ԱՄՆ-ն և Իրանը վարել են «շատ լավ և բեղմնավոր» բանակցություններ՝ ուղղված տարածաշրջանում թշնամական գործողությունների վերջնական դադարեցմանը։ Նա նաև հայտարարել էր, թե հրահանգել է հինգ օրով հետաձգել Իրանի էներգետիկ ենթակառուցվածքների վրա նախատեսված ռազմական հարձակումները՝ հիմնվելով քննարկումների «կառուցողական» ընթացքի վրա։
Իրանական կողմը, սակայն, հորդորում է չվստահել այդ հայտարարություններին՝ դրանք համարելով քարոզչական հնարք, որի նպատակն է թուլացնել լարվածությունը շուկաներում՝ առանց իրական դիվանագիտական քայլեր ձեռնարկելու։
Հետևեք մեզ տելեգրամում
