ԱՄՆ-ն և Իրանը հայտարարել են երկշաբթյա հրադադարի մասին: Ապրիլի 10-ին կողմերը բանակցություններ են սկսելու Պակիստանի մայրաքաղաք Իսլամաբադում: Փոխանցում են իրանական ու ամերիկյան ԶԼՄ-ները:
ԱՄՆ նախագահ Դոնալդ Թրամփը հայտարարել է, որ ԱՄՆ-ն հասել է իր նպատակներին և դադարեցում է Իրանի դեմ հարձակումներն ու ռմբակոծությունը՝ պայմանով, որ Իրանն «ամբողջությամբ, անմիջապես և անվտանգ» բացելու է Հորմուզի նեղուցը: Նա նաև ընդգծել, որ Իրանի ներկայացրած 10 կետանոց փաստաթուղթը ընդունում են որպես բանակցությունների հիմք:
Իրանի ազգային անվտանգության գերագույն խորհուրդն իր հերթին հայտարարել է, որ «երկիրը հասել է մեծ հաղթանակի և կարողացել է իր պայմանները պարտադրել հակառակ կողմին»։ Հայտարարության համաձայն՝ այդ կետերը ներառում են հետևյալ սկզբունքնեը՝
- Իրանի վրա չհարձակվելու երաշխիքների տրամադրում,
- Հորմուզի նեղուցի նկատմամբ վերահսկողության պահպանում,
- Ուրանի հարստացման Իրանի իրավունքի ճանաչում,
- Իրանի նկատմամբ բոլոր առաջնային և երկրորդային պատժամիջոցների չեղարկում,
- ՄԱԿ-ի Անվտանգության խորհրդի և ՄԱԳԱՏԷ-ի Կառավարիչների խորհրդի բոլոր բանաձևերի դադարեցում,
- Արտասահմանում Իրանի հաշիվների ապասառեցում,
- Իրանի կրած վնասների փոխհատուցում,
- Տարածաշրջանից ԱՄՆ ռազմական ուժերի դուրսբերում,
- Բոլոր ճակատներում, այդ թվում՝ Լիբանանում ռազմական գործողությունները դադարեցում։
- ՄԱԿ ԱԽ բանաձևով այդ կետերի ամրագրում:
ԱԽ հայտարարության մեջ նաև ընդգծվել է, որ պատերազմում Իրանի գրեթե բոլոր նպատակները իրականացված են։ Հայտարարության համաձայն՝ բանակցությունների համար սահմանվել է մինչև երկու շաբաթ ժամկետ, որը կարող է երկարաձգվել կողմերի համաձայնությամբ։ Միաժամանակ ընդգծվում է, որ այս գործընթացը դեռ չի նշանակում պատերազմի ավարտ, և Իրանը պատրաստ է շարունակել ռազմական գործողությունները, եթե բանակցությունները չհանգեցնեն իր պահանջների լիարժեք իրականացմանը։
Թեհրանը նաև զգուշացնում է, որ հակառակ կողմի ցանկացած «սխալ քայլ» կարժանանա կոշտ պատասխանի՝ ընդգծելով, որ իրավիճակը շարունակում է մնալ լարված, իսկ վերջնական արդյունքը կախված է առաջիկա բանակցություններից։
Հիշեցնենք, որ ավելի վաղ ԱՄՆ նախագահ Դոնալդ Թրամփը հայտարարել էր. «Մի ամբողջ քաղաքակրթություն կոչնչանա այսօր գիշեր, և երբեք չի վերականգնվի։ Ես չեմ ուզում, որ դա տեղի ունենա, բայց հավանաբար տեղի կունենա»։ Թեհրանն իր հերթին արձագանքել էր՝ ընդգծելով, որ վճռականորեն կպատասխանի, եթե Վաշինգտոնը իրականացնի իր սպառնալիքները:
Հետևեք մեզ տելեգրամում
