Վրաստանի խորհրդարանի խոսնակ Շալվա Պապուաշվիլին Ստամբուլում ընթացող Միջխորհրդարանական միության գլխավոր ասամբլեայի ժամանակ հանդես է եկել նախաձեռնությամբ՝ առաջարկելով ճանաչել արտաքին միջամտությունը որպես ժողովրդավարության և ինքնիշխանության գլխավոր սպառնալիք: Փոխանցում է Newsgeorgia լրատվական կայքը:
Նա կոչ է արել դուրս գալ լոկ հայտարարությունների մակարդակից և ստեղծել ընդհանուր, իրավաբանորեն պարտադիր միջազգային շրջանակ: Պապուաշվիլիի համոզմամբ՝ նմանատիպ գլոբալ օրենսդրական մեխանիզմը թույլ կտա ոչ միայն պաշտպանել պետությունները, այլև ամրապնդել խաղաղությունն ու վերականգնել վստահությունը միջազգային հարաբերություններում:
Պաշտոնյան անդրադարձել է Վրաստանում ընդունված «օտարերկրյա գործակալների» մասին օրենքին՝ ընդգծելով, որ բոլոր նմանատիպ օրենքները հիմնված են մեկ սկզբունքի վրա. ժողովրդավարությունը պետք է ձևավորվի ժողովրդի, այլ ոչ թե արտաքին ուժերի կողմից: Պապուաշվիլին նաև դժգոհել է միջազգային գործընկերների «երկակի ստանդարտներից»՝ նշելով, որ տարբեր երկրներում կիրառվող նույնանման միջոցները գնահատվում են տարբեր կերպ՝ որպես պաշտպանություն կամ որպես սահմանափակում:
Հիշեցնենք, որ «օտարերկրյա գործակալների» մասին օրենքը դարձել է «Վրացական երազանք» կուսակցության և Արևմուտքի հարաբերությունների լարվածության գլխավոր պատճառը: ԵՄ-ն և ԱՄՆ-ն բազմիցս քննադատել են այս նախաձեռնությունը՝ նշելով, որ այն սահմանափակում է արտահայտվելու ազատությունը և ճնշում անկախ մեդիան ու ՀԿ-ները:
Հետևեք մեզ տելեգրամում
