Լիբանանի նախագահ Ժոզեֆ Աունը հայտարարել է, որ Իսրայելի հետ նախատեսվող խաղաղ բանակցությունները չպետք է կապվեն Իրանի հետ ընթացող հակամարտության կարգավորման գործընթացի հետ։ Այս մասին հայտնել է «CNN World»-ը։
Աունի խոսքով՝ Լիբանանը կանգնած է ընտրության առաջ՝ կամ շարունակել պատերազմը՝ դրա հումանիտար, սոցիալական և տնտեսական ծանր հետևանքներով, կամ անցնել բանակցությունների՝ հասնելու երկարաժամկետ կայունության։ Աունը նաև նշել է, որ իր կառավարությունը հավատարիմ է «Հեզբոլլահ» շարժման զինաթափման գործընթացին։
Նախագահի խոսքով՝ բանակցությունների հիմնական նպատակներն են՝ դադարեցնել ռազմական գործողությունները, ավարտել Իսրայելի ներկայությունը Լիբանանի հարավային շրջաններում և ապահովել լիբանանյան բանակի տեղակայումը միջազգային ճանաչում ունեցող սահմաններին։
Աունը նաև ընդգծել է, որ Դոնալդ Թրամփը նպաստել է հրադադարի հաստատմանը և բանակցությունների մեկնարկին։ Ակնկալվում է, որ բանակցությունները կարող են շարունակվել արդեն այս շաբաթ։
Իր հերթին, Իսրայելի վարչապետ Բենիամին Նեթանյահուն հայտարարել է, որ իսրայելական զորքերը չեն լքի Լիբանանի հարավում զբաղեցրած դիրքերը գործող 10-օրյա հրադադարի ընթացքում, որի ժամկետը լրանում է այս շաբաթվա վերջին։
Միաժամանակ, Իրանը շարունակում է լիբանանյան զարգացումները կապել իր և ԱՄՆ-ի միջև հակամարտության հետ՝ պահանջելով դադարեցնել իսրայելական հարվածները Լիբանանի և խմբավորման դեմ։ Իրանի խորհրդարանի խոսնակ Մոհամմադ Բաղեր Ղալիբաֆն ընդգծել է, որ Իրանի և ԱՄՆ-ի միջև «համապարփակ հրադադարի» համաձայնագրի քննարկման դեպքում Լիբանանը պետք է ներառվի դրա մեջ։
Հիշեցնենք, որ ապրիլի 14-ին 1993 թվականից ի վեր առաջին անգամ Վաշինգտոնում ԱՄՆ միջնորդությամբ Իսրայելի և Լիբանանի միջև տեղի էին ունեցել ուղիղ բանակցություններ երկու երկրների դեսպանների, ԱՄՆ պետքարտուղար Մարկո Ռուբիոյի, ինչպես նաև ԱՄՆ դիվանագետների մասնակցությամբ։ Իսկ «Հեզբոլլահ»-ը կտրականապես մերժել էր բանակցությունները՝ դրանք որակելով որպես «անիմաստ» և «զիջում» Իսրայելին ու ԱՄՆ-ին։
Հետևեք մեզ տելեգրամում
