Իրանի զինված ուժերի «Խաթամ ալ-Անբիա» կենտրոնական շտաբի խոսնակը հայտնել է, որ Միացյալ Նահանգները խախտել է հրադադարի ռեժիմը՝ թիրախավորելով իրանական նավթակիր նավերն ու քաղաքացիական ենթակառուցվածքները։
Ըստ իրանական կողմի տարածած հայտարարության՝ ամերիկյան ուժերը հարձակվել են երկու նավթակիր նավի վրա, որոնցից մեկը շարժվում էր Ջասկի շրջանից դեպի Հորմուզի նեղուց, իսկ մյուսը մուտք էր գործում նեղուց՝ ԱՄԷ-ի Ֆուջեյրա նավահանգստի դիմաց։ Խոսնակը նաև հավելել է, որ ԱՄՆ-ն, տարածաշրջանի որոշ երկրների հետ համագործակցությամբ, օդային հարձակման է ենթարկել քաղաքացիական տարածքներ Բանդար Խամիրի, Սիրիկի ափերին և Ղեշմ կղզում։
Նա հայտնել է, որ ի պատասխան այս գործողությունների՝ Իրանի զինված ուժերը հարվածներ են հասցրել ամերիկյան ռազմական նավերին։ Հարձակումներն իրականացվել են Հորմուզի նեղուցի արևելյան հատվածում և Չաբահար նավահանգստի հարավում։
Իրանական կողմի պնդմամբ՝ ամերիկյան ռազմական նավերին հասցվել են զգալի վնասներ։ ԱՄՆ ԶՈւ կենտրոնական հրամանատարությունը, սակայն, հերքել է ռազմանավերի վնասումը՝ հայտարարելով, որ հետ են մղել իրանական հարձակումները: Ամերիկյան կողմը նաև հայտնել է, որ թիրախավորել են իրանական այն ռազմական օբյեկտները, որտեղից իրականացվել են հարձակումները, այդ թվում՝ հրթիռների և ԱԹՍ-ների արձակման կայաններ, հրամանատարական կետեր:
Հետևեք մեզ տելեգրամում
