Պետական եկամուտների կոմիտեի նախագահի տեղակալ Ռաֆայել Գևորգյանի գլխավորությամբ մեկնարկել են Ասիական զարգացման բանկի (ԱԶԲ) հետ համատեղ իրականացվող «Սահմանային անցակետերի արդիականացման և համատեղ հսկողության իրականացման» ծրագրի շրջանակում եռօրյա աշխատանքային հանդիպումները։
Հանդիպումների ընթացքում քննարկվել են Հայաստանի և Վրաստանի միջև համատեղ սահմանային անցակետի ստեղծմանն ու գործունեությանը վերաբերող մի շարք հարցեր, այդ թվում տեղեկատվության փոխանակման և կառավարման համակարգերը, ինչպես նաև նախագծի տեխնիկական լուծումները։ Նշվում է, որ ԱԶԲ-ի կողմից նմանատիպ հանդիպում արդեն կազմակերպվել է նաև վրաց գործընկերների հետ։ Հանդիպումների արդյունքները հիմք կծառայեն Հայաստանի և Վրաստանի միջև համատեղ սահմանային անցման կետի ներդրման վերաբերյալ համաձայնագրի նախագծի մշակման համար։
Գևորգյանը ընդգծել է, որ համատեղ անցակետը ռազմավարական նշանակություն ունի Հայաստանի համար և կլինի հայ-վրացական սահմանին համատեղ հսկողության առաջին փորձը։ Ծրագրի շրջանակում արդեն իրականացվել են սահմանահատման գործընթացների վերլուծություններ և կարիքների գնահատում։ Պիլոտային ծրագրի համար ընտրվել է Գոգավան-Գուգուտի անցակետը, իսկ քննարկված մոդելներից նախապատվությունը տրվել է «ինտեգրված հարմարությունների» տարբերակին։
Հետևեք մեզ տելեգրամում
