Հայաստանի արտաքին գործերի նախարար Արարատ Միրզոյանը հայտարարել է, որ TRIPP նախագծի ստորագրումը սպասվում է առաջիկա շաբաթների ընթացքում։ Նրա խոսքով՝ նախագծի տեքստն ամբողջությամբ համաձայնեցված է, սակայն դեռ կան տեխնիկական ընթացակարգեր, որոնք պետք է ավարտվեն մասնակից երկրներում։
«Վստահեցնում եմ՝ տեքստն ամբողջությամբ համաձայնեցված է, քաղաքական ընկալումը և համաձայնեցումները կան, բայց տեխնիկական ընթացակարգեր կան, որոնք պետք է երկրներում անցնեն», – ասել է Միրզոյանը ասուլիսի ժամանակ։ Նախարարը նշել է, որ ստորագրման կարիք ունեն նաև մի շարք տեխնիկական փաստաթղթեր, այդ թվում՝ TRIPP ընկերության կանոնադրությունը։ «Հուսով եմ, որ մոտ ապագայում արդեն գետնի վրա աշխատանքներ կտեսնենք», – հավելել է նա։
Միրզոյանի խոսքով՝ թե՛ ԱՄՆ, թե՛ Հայաստանի կառավարությունները շարունակում են ակտիվ աշխատել նախագծի իրականացման ուղղությամբ՝ չնայած աշխարհաքաղաքական և ներքաղաքական գործընթացներին։ Ավելի վաղ ՀՀ արտաքին գործերի նախարարությունը հրապարակել էր TRIPP-ի վերաբերյալ ռազմավարական համագործակցության շրջանակային համաձայնագրի տեքստը։
Հետևեք մեզ տելեգրամում
