Իսրայելական բանակը ոչնչացրել է Լիբանանի «Հեզբոլլահ» զինված խմբավորման կողմից օգտագործվող ստորգետնյա ենթակառուցվածքները երկրի հարավում գտնվող բնակավայրերից մեկում։ Այս մասին հայտնել են Իսրայելի վարչապետը և պաշտպանության նախարարը՝ համատեղ հայտարարությամբ, փոխանցում է «Reuters»-ը։
Ըստ հաղորդագրության՝ հարվածը հասցվել է Մաջդալ Զուն գյուղում գտնվող շուրջ 200 մետր երկարությամբ թունելին, որը, իսրայելական կողմի պնդմամբ, օգտագործվել է զենքի պահեստավորման և ռազմական նպատակներով։ Իսրայելական կողմը հայտնել է, որ գործողության մասին նախապես տեղեկացվել են ԱՄՆ-ում։ Ըստ Իսրայելի հայտարարության՝ թունելում պահվել են հարյուրավոր զենքեր և հրթիռային համակարգեր։
Հարվածը տեղի է ունեցել այն բանից հետո, երբ Իսրայելը ավելի վաղ հայտարարել էր նաև «Հեզբոլլահի» զինյալների և հրթիռային կայանի թիրախավորման մասին Լիբանանի հարավում։ «Հեզբոլլահը» Իսրայելի գործողությունները որակել է հրադադարի «ակնհայտ խախտում»՝ հայտարարելով, որ հետևում է իրավիճակին և իրեն իրավունք է վերապահում պաշտպանել երկիրը։ Միաժամանակ Իսրայելի վարչապետ Բենիամին Նեթանյահուն հայտարարել է, որ իսրայելական զորքերը կշարունակեն մնալ Լիբանանի հարավում անվտանգության գոտում և շարունակելու են ռազմական ենթակառուցվածքների ոչնչացումը։
Լիբանան-Իսրայել վերջին համաձայնությունը, որը միջնորդվել է ԱՄՆ-ի կողմից, նախատեսում է փուլային զորքերի դուրսբերում և լիբանանյան բանակի տեղակայում որոշ շրջաններում, սակայն Իսրայելը ժամանակավորապես պահպանում է ներկայությունը անվտանգության գոտում։
Հետևեք մեզ տելեգրամում
