«Ամբերդ ամրոց» պատմամշակութային արգելոցում իրականացվող վերականգնման և մաքրման աշխատանքների ընթացքում հնագետները մի շարք ուշագրավ գտածոներ են հայտնաբերել, այդ թվում՝ մարդկային կմախք և բացառիկ արժեք ներկայացնող մետաղադրամ։ Հայտնել է ՀՀ կրթության, գիտության, մշակույթի և սպորտի նախարարության «Պահպանության ծառայություն» ՊՈԱԿ-ը։
Ամրոցի ներքին աշտարակավոր պատի արտաքին կողմում՝ կենտրոնական հատվածից մոտ մեկ մետր դեպի արևելք, հայտնաբերվել է մարդկային կմախք։ Նախնական տվյալներով՝ ոսկորների շուրջ 90 տոկոսը պահպանվել է տեղում, բացակայում են միայն ձեռքի մատների ոսկորները։ Մասնագետների գնահատմամբ՝ ատամնաշարի ուսումնասիրությունը թույլ է տալիս ենթադրել, որ մահացածը երիտասարդ տարիքի անձ է եղել։
Ամենաարժեքավոր գտածոներից մեկը, ըստ մասնագետների, Թամար թագուհու ժամանակաշրջանին վերագրվող մետաղադրամն է, որը պատմական և գիտական բացառիկ նշանակություն ունի։
Մաքրման աշխատանքների ընթացքում հայտնաբերվել են նաև միջնադարյան «տամա» խաղի (շաշկիին նման սեղանի խաղ) ենթադրյալ մասունքներ, որոնք կարող են վկայել այդ ժամանակաշրջանում ամրոցի բնակիչների առօրյայի և ժամանցի մասին։
ՊՈԱԿ-ից հայտնել են, որ Ամբերդ ամրոցում մաքրման և հնագիտական աշխատանքները շարունակվում են, և մասնագետները չեն բացառում, որ առաջիկայում կբացահայտվեն ամրոցի պատմությանն առնչվող նոր ու կարևոր փաստեր։
Հետևեք մեզ տելեգրամում
