Ուկրաինան դիմել է Եվրոպական միության գործընկերներին՝ խնդրելով Եվրոպական խաղաղության հիմնադրամից (European Peace Facility) տրամադրել 6,6 միլիարդ եվրո ռազմական օգնություն։ Կիևը կարծում է, որ ռազմաճակատում առաջիկա 6-9 ամիսները վճռորոշ հնարավորություն են ստեղծում իրավիճակը փոխելու համար, գրում է «Reuters»-ը։
Ուկրաինայի պաշտպանության նախարար Միխայիլ Ֆյոդորովի՝ ԵՄ գործընկերներին ուղղված նամակի համաձայն՝ երկրի պաշտպանական ընդհանուր կարիքն այս տարի գնահատվում է շուրջ 136 միլիարդ եվրո։ Այդ գումարից մոտ 53 միլիարդ եվրոն ապահովում է Ուկրաինայի պետական բյուջեն։ Այս տարի Ուկրաինան ԵՄ 90 միլիարդ եվրոյի վարկային ծրագրի շրջանակում պաշտպանության համար կստանա շուրջ 28,3 միլիարդ եվրո, սակայն, նախարարի խոսքով, նույնիսկ այդ միջոցների և սեփական ֆինանսավորման պարագայում զգալի ֆինանսական բաց է պահպանվում։
Ֆյոդորովը նշել է, որ Եվրոպական խաղաղության հիմնադրամի միջոցները կարող են դառնալ այս տարվա ընթացքում Ուկրաինայի պաշտպանությանն ուղղված եվրոպական ամենաազդեցիկ ներդրումներից մեկը, եթե դրանք տրամադրվեն այն ուղղություններին, որտեղ կարող են ապահովել ամենաարագ ռազմական արդյունքը։ Միաժամանակ նա ավելի վաղ հայտարարել էր, որ դիմել է նաև Ուկրաինայի պաշտպանության կոնտակտային խմբին (Ռամշտայնի ձևաչափ)՝ լրացուցիչ 20 միլիարդ դոլարի ռազմական ֆինանսավորում ստանալու խնդրանքով՝ արդեն խոստացված 40 միլիարդ դոլարից բացի։
Հետևեք մեզ տելեգրամում
