Ռուսական զինված ուժերը հուլիսի 2-ի գիշերը անօդաչու թռչող սարքերով և բալիստիկ հրթիռներով զանգվածային հարված են հասցրել Ուկրաինայի մայրաքաղաք Կիևին։ Ուկրաինական իշխանությունների տվյալներով՝ հարձակման հետևանքով զոհվել է 13 մարդ, ևս 86-ը վիրավորվել են, որոնցից 70-ը հոսպիտալացվել են։
Կիևի քաղաքային ռազմական վարչակազմի ղեկավար Տիմուր Տկաչենկոյի խոսքով՝ վնասներ և ավերածություններ են գրանցվել քաղաքի բոլոր վարչական շրջաններում՝ ավելի քան 30 հասցեում։
Ամենաշատ վնասները կրել են բազմաբնակարան շենքերը։ Մասնակիորեն փլուզվել են Դառնիցկի շրջանի 5, 9 և 16 հարկանի բնակելի շենքերը, վնասվել են նաև Պեչերսկի և Դեսնյանսկի շրջանների բազմահարկերը։ Հրդեհներ են բռնկվել Շևչենկոյի և Գոլոսեևի շրջանների բնակելի շենքերում, ինչպես նաև հյուրանոցային շենքում, իսկ Օբոլոնսկի շրջանում այրվել է պահեստային տարածք։
Ուկրաինայի արտակարգ իրավիճակների պետական ծառայության տվյալներով՝ հետևանքների վերացման աշխատանքներին ներգրավված են շուրջ 570 փրկարար և ավելի քան 120 միավոր տեխնիկա։
Ռուսաստանի պաշտպանության նախարարությունը հայտարարել է, որ իրականացրել է «բարձր ճշգրտության զենքով» և անօդաչու սարքերով զանգվածային հարված՝ ի պատասխան, «Կիևի ռեժիմի ահաբեկչական հարձակումների Ռուսաստանի քաղաքացիական ենթակառուցվածքների դեմ»։ ՌԴ ՊՆ-ի պնդմամբ՝ թիրախավորվել են Կիևի և Կիևի մարզի ռազմարդյունաբերական ձեռնարկություններն ու վառելիքաէներգետիկ օբյեկտները, ինչպես նաև ռազմական օդանավակայանների ենթակառուցվածքները Դնեպրոպետրովսկի, Պոլտավայի, Չերկասիի, Չեռնիգովի և Կիևի մարզերում։
Հարձակման ֆոնին Լեհաստանի զինված ուժերը օդ են բարձրացրել կործանիչներ՝ երկրի օդային տարածքի անվտանգությունն ապահովելու նպատակով։
Հետևեք մեզ տելեգրամում
