ԻԻՀ արտգործնախարար Աբբաս Արաղչին հայտարարել է, որ քանի դեռ Թեհրանի նկատմամբ սպառնալիքները շարունակվում են, ԱՄՆ-Իրան վերջնական համաձայնագրի համար բանակցությունները չեն սկսվի: Այս մասին նա գրառում է կատարել X-ի իր էջում:
«Միլիոնավոր հպարտ իրանցիներ միասնությամբ ու համերաշխությամբ համախմբվել են՝ իրենց հարգանքի տուրքը մատուցելու այաթոլլահ Ալի Խամենեիին և նրա թողած մնայուն ժառանգությանը։ Ո՛չ նրանք, և ո՛չ էլ մեր քաջարի զինված ուժերը որևէ սպառնալիքից վախ չունեն: Փոխըմբռնման հուշագրի 13-րդ կետը լիովին հստակ է և միանշանակ. քանի դեռ Իրանի դեմ ուղղված սպառնալիքները շարունակվում են, վերջնական համաձայնագրի հասնելու շուրջ բանակցությունները չեն մեկնարկի։ Հավատարի՛մ մնացեք ձեր իսկ ստորագրությանը»,- գրել է Արաղչին։
Ավելի վաղ ԱՄՆ նախագահ Դոնալդ Թրամփը հայտարարել էր, որ Միացյալ Նահանգները կա՛մ համաձայնության կգա Իրանի հետ, կա՛մ «ավարտին կհասցնի գործը»՝ միաժամանակ պնդելով, որ Վաշինգտոնն ունակ է կաթվածահար անել Իրանի կենսական ենթակառուցվածքները, եթե նման որոշում կայացնի։
«Մենք հաղթելու ենք այս կամ այն տարբերակով։ Մենք կա՛մ համաձայնագիր կկնքենք, կա՛մ ավարտին կհասցնենք գործը»,-հայտարարել էր Թրամփը։
Հիշեցնենք, որ Իրանն ու ԱՄՆ-ն փոխըմբռնման հուշագիր էին ստորագրել, որի մի շարք կետերի իրագործման դեպքում կողմերը պետք է մեկնարկեին վերջնական համաձայնագրի շուրջ բանակցությունները:
Հետևեք մեզ տելեգրամում
