Ուկրաինայի նախագահ Վոլոդիմիր Զելենսկին մտադիր է երկրի վարչապետ Յուլիա Սվիրիդենկոյին առաջարկել Ուկրաինա-ԱՄՆ հարաբերությունների «նոր կարևոր ուղղության ղեկավարումը»։ Այս մասին հայտնում է «BBC»-ի ռուսական ծառայությունը։
«Շնորհակալ եմ Յուլիային վարչապետի պաշտոնում հստակ, կայուն և արդյունավետ աշխատանքի, ինչպես նաև Ուկրաինայի թիմում տարիների արդյունավետ գործունեության համար։ Ես նրան առաջարկել եմ գլխավորել առանցքային գործընկերոջ հետ մեր հարաբերությունների նոր կարևոր ուղղությունը»,- նշել է Զելենսկին։
Ըստ ուկրաինական ԶԼՄ-ների՝ Սվիրիդենկոն կարող է նշանակվել ԱՄՆ-ում Ուկրաինայի դեսպան ՝ փոխարինելով Օլգա Ստեֆանիշինային, որը, ըստ աղբյուրների, անձնական պատճառներով ցանկություն է հայտնել ավարտել իր դիվանագիտական առաքելությունը։
Ուկրաինայի նախագահը նաև հայտնել է, որ արտաքին քաղաքականության յուրաքանչյուր առաջնահերթ ուղղություն այսուհետ կղեկավարի համապատասխան փորձ ունեցող առանձին պաշտոնյա։ Նրա խոսքով՝ առաջնահերթություններից են ԱՄՆ-ի հետ համագործակցությունը, այդ թվում՝ «Patriot» հակաօդային պաշտպանության համակարգերի հրթիռների արտադրության լիցենզավորման պայմանավորվածությունները, ինչպես նաև եվրոպական հակաբալիստիկ պաշտպանության նախագծի զարգացումը։
Ուկրաինայի օրենսդրության համաձայն՝ վարչապետի նշանակումն ու կառավարության կազմի հաստատումը Գերագույն ռադայի լիազորությունների տիրույթում են: Ակնկալվում է, որ խորհրդարանը համապատասխան նշանակումները կհաստատի հաջորդ շաբաթ։
«Reuters»-ի տվյալներով՝ վարչապետի պաշտոնի հիմնական հավանական թեկնածուների թվում են նախկին վարչապետ Դենիս Շմիգալը, պաշտպանության նախարար Միխայլո Ֆյոդորովը և «Նաֆտոգազ Ուկրաինայի» ղեկավար Սերգեյ Կորեցկին։
Զելենսկին վարչապետի փոփոխության մասին հայտարարությունից անմիջապես հետո հանդիպումներ է ունեցել Սերգեյ Կորեցկու, Դենիս Շմիգալի, ներքին գործերի նախարար Իգոր Կլիմենկոյի և Խարկովի քաղաքապետ Իգոր Տերեխովի հետ։ Նախագահը նաև հայտարարել է, որ նախատեսվում են փոփոխություններ իրավապահ մարմինների ղեկավար կազմում։
Նշենք, որ 40-ամյա Յուլիա Սվիրիդենկոն վարչապետի պաշտոնը զբաղեցրել է 2025 թվականի հուլիսից՝ դառնալով հետխորհրդային Ուկրաինայի պատմության երկրորդ կին վարչապետը։ Մինչ այդ նա եղել է նախագահի աշխատակազմի ղեկավարի տեղակալ, իսկ ավելի վաղ՝ շուրջ չորս տարի զբաղեցրել է փոխվարչապետի պաշտոնը՝ համակարգելով տնտեսական զարգացման և առևտրի ոլորտները։
Հետևեք մեզ տելեգրամում
