Զախարովա․ Մոսկվան սպասում է Երևանի և Բաքվի համաձայնությանը՝ «3+3» ձևաչափով ԱԳ նախարարների հաջորդ հանդիպումների վերաբերյալ

Ռուսաստանը սպասում է, որ Երևանն ու Բաքուն համաձայնեցնեն «3+3» տարածաշրջանային հարթակի մասնակից երկրների արտգործնախարարների հաջորդ հանդիպումների անցկացման հերթականությունը։ Այս մասին լրագրողների հետ ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

Նրա խոսքով՝ նման պայմանավորվածություն ձեռք է բերվել 2025 թվականին Ստամբուլում կայացած «3+3» ձևաչափի նախարարական հանդիպման ընթացքում։

Զախարովան անդրադարձել է նաև 2026 թվականի հունիսի 5-ին Սանկտ Պետերբուրգի միջազգային տնտեսական համաժողովի շրջանակում անցկացված «3+3» հարթակի առաջին փորձագիտական նիստին՝ նշելով, որ դրա մասնակիցները հանդես են եկել հօգուտ փոխշահավետ տնտեսական նախագծերի վրա կենտրոնանալու՝ առանց գործընթացը քաղաքականացնելու։

«Մենք լիովին կիսում ենք այդ մոտեցումը», – ասել է ՌԴ ԱԳՆ ներկայացուցիչը։

Նա հիշեցրել է, որ «3+3» հարթակը, որի կազմում են Հայաստանը, Ադրբեջանը, Վրաստանը, Ռուսաստանը, Իրանը և Թուրքիան, ստեղծվել է 2021 թվականին՝ Հարավային Կովկասում ծագող հարցերը տարածաշրջանի երկրների և նրանց անմիջական հարևանների մասնակցությամբ քննարկելու նպատակով։

Զախարովայի խոսքով՝ ձևաչափի օրակարգը մշակվել է արտաքին քաղաքական գերատեսչությունների երեք հանդիպումների ընթացքում՝ 2021 թվականին Մոսկվայում, 2023 թվականին Թեհրանում և 2025 թվականին Ստամբուլում։

Միաժամանակ նա ընդգծել է, որ «3+3» ձևաչափում երկկողմ հարցերի քննարկում նախատեսված չէ։