ԱՄՆ նախագահ Դոնալդ Թրամփի վարչակազմը հուլիսի 25-ից նոր մաքսատուրքեր է սահմանել 60 առևտրային գործընկեր երկրների նկատմամբ՝ դրանք հիմնավորելով հարկադիր աշխատանքի դեմ պայքարի անբավարար միջոցառումներով, հայտնել է «NDTV World»-ը։
Նոր դրույքաչափերը կկազմեն 10% և 12,5% և կկիրառվեն ներմուծվող ապրանքների մեծ մասի նկատմամբ՝ փոխարինելով ժամանակավոր 10%-անոց համընդհանուր մաքսատուրքին, որի գործողության ժամկետն ավարտվել է։
ԱՄՆ առևտրային ներկայացուցիչ Ջեյմիսոն Գրիրը հայտարարել է, որ Վաշինգտոնը գրեթե մեկ դար խստորեն կիրառում է հարկադիր աշխատանքի արդյունքում արտադրված ապրանքների ներմուծման արգելքը և ակնկալում է, որ առևտրային գործընկերները նույնպես նման քայլեր կձեռնարկեն։
10%-անոց մաքսատուրք կկիրառվի, մասնավորապես, Հնդկաստանի, Կանադայի, Մեծ Բրիտանիայի, Բանգլադեշի, Մեքսիկայի, Ինդոնեզիայի, Մալայզիայի, Պակիստանի, Շրի Լանկայի և ևս մի շարք երկրների նկատմամբ։
12,5%-անոց դրույքաչափ կգործի 38 երկրի, այդ թվում՝ Չինաստանի համար։
Միաժամանակ Եվրամիության, Ճապոնիայի, Հարավային Կորեայի, Թայվանի և Շվեյցարիայի նկատմամբ սահմանված մաքսատուրքերը, գործող մյուս մաքսային վճարների հետ միասին, ընդհանուր առմամբ կկազմեն 10% կամ 12,5%։
Նոր մաքսատուրքերը սահմանվել են ԱՄՆ-ի 1974 թվականի Առևտրի մասին օրենքի 301-րդ հոդվածի հիման վրա։ Վարչակազմի գնահատմամբ՝ այս մեխանիզմն իրավական առումով ավելի կայուն է, քան նախկին «փոխադարձ մաքսատուրքերը», որոնք ԱՄՆ Գերագույն դատարանը փետրվարին ճանաչել էր անօրինական։
Միևնույն ժամանակ, մի շարք ապրանքներ՝ նավթը, բնական գազը, պարարտանյութերը, որոշ սննդամթերք, ինչպես նաև արդեն ազգային անվտանգության հիմքով մաքսատուրքերի ենթակա պողպատը, ալյումինը, պղինձը և ավտոմեքենաները, ազատվել են նոր սահմանափակումներից։
Հետևեք մեզ տելեգրամում
