Մոսկվայի մարզում ուկրաինական անօդաչու թռչող սարքի հարձակման հետևանքով առնվազն հինգ մարդ է զոհվել, ևս 10-ը՝ վիրավորվել։ Այս մասին հայտնել է Մոսկվայի մարզի ղեկավար Անդրեյ Վորոբյովը։
Նրա խոսքով՝ հարձակումը տեղի է ունեցել Չեխով քաղաքի մոտ գտնվող Նովոսյոլկի բնակավայրում։ Հարձակման հետևանքով պահեստում հրդեհ է բռնկվել։
Ուկրաինական լրատվամիջոցների տվյալներով՝ հարվածի ենթարկված տարածքը կապված է «Wildberries» ընկերության հետ։ Կիևը պնդում է, որ ընկերության պահեստներն օգտագործվում են ռուսական բանակին մատակարարումներ իրականացնելու համար, ինչը Մոսկվան հերքում է։
Տեղական իշխանությունների տվյալներով՝ «Wildberries»-ի պահեստները հարձակման են ենթարկվել նաև Սանկտ Պետերբուրգի և Տվերի մարզերում։ Ընկերությունը հաստատել է Սանկտ Պետերբուրգում իր օբյեկտի վնասվելու փաստը։ Ռուսաստանի պաշտպանության նախարարությունն էլ հայտնել է, որ գիշերվա ընթացքում որսացել և ոչնչացրել է 320 ուկրաինական անօդաչու թռչող սարք։
Միաժամանակ, ռուսական հարվածների հետևանքով Ուկրաինայում առնվազն չորս մարդ է զոհվել։ Միկոլաևում զոհվել է 89-ամյա կին, իսկ յոթ մարդ վիրավորվել է, այդ թվում՝ երկու և 12 տարեկան աղջիկներ։ Սումիում բնակելի թաղամասի հարվածի հետևանքով զոհվել են 5 և 10 տարեկան երկու աղջիկներ, ևս չորս մարդ վիրավորվել է։
Հետևեք մեզ տելեգրամում
