ԱՄՆ-ում գործող Ցեղասպանությունների կանխարգելման Լեմկինի ինստիտուտն աջակցություն է հայտնել Արցախի նախկին պետնախարար, բարերար Ռուբեն Վարդանյանի կնոջ՝ Վերոնիկա Զոնաբենդի նախաձեռնությանը՝ Բաքվում պահվող հայ բանտարկյալներին այցելելու նպատակով կանանց միջազգային մարդասիրական պատվիրակություն ձևավորելու վերաբերյալ։ Այս մասին հայտնում է «Մեդիամաքս»-ը։
Ինստիտուտը կոչ է արել ԱՄՆ-ի, Կանադայի, Մեծ Բրիտանիայի, ԵՄ-ի և ԵՄ անդամ երկրների կառավարություններին՝ Ադրբեջանում իրենց դիվանագիտական ներկայության միջոցով երաշխավորել Զոնաբենդի և Բաքու մեկնող մյուս կանանց անվտանգությունը։
Լեմկինի ինստիտուտը նաև կոչ է արել իրավապաշտպաններին, քաղաքական գործիչներին, ազդեցիկ անհատներին և միջազգային կազմակերպություններին աջակցել Բաքվում պահվող հայերի ընտանիքներին և նրանց հնարավորություն տալ այցելելու իրենց հարազատներին։
Զոնաբենդի նախաձեռնությունը նպատակ ունի մարդասիրական առաքելության շրջանակում այցելել Բաքու և հանդիպել այնտեղ պահվող հայերին, այդ թվում՝ իր ամուսնուն՝ Ռուբեն Վարդանյանին։
Հետևեք մեզ տելեգրամում
