Վրաստանի 14 քրեակատարողական հիմնարկներում, որոնք նախատեսված են ընդհանուր առմամբ 12,344 անձի համար, հունիսի 30-ի դրությամբ պահվել է 12,332 մեղադրյալ և դատապարտյալ։ Սա նշանակում է, որ ամբողջ համակարգում ազատ էր մնացել ընդամենը 12 տեղ։ Տվյալները հրապարակել է Վրաստանի ազգային վիճակագրական ծառայությունը:
Ըստ ծառայության տվյալների՝ անազատության մեջ գտնվողների 77.2%-ը դատապարտյալներ են, իսկ մնացածը նախնական կալանքի տակ են և սպասում են դատավճռին։ Բանտարկյալների թվում կա 617 կին, 168 անչափահաս և 70 տարեկանից բարձր 84 անձ։
Օտարերկրյա քաղաքացիները կազմում են բանտարկյալների ընդհանուր թվի 14.8%-ը (1,830 մարդ)։ Նրանցից 619-ը գտնվում են նախնական կալանքի տակ, իսկ մյուսները տարբեր ժամկետներով ազատազրկման են դատապարտված:
Վրաստանի մարդու իրավունքների նախկին պաշտպանի տեղակալ Գեորգի Բուրջանաձեի տվյալներով՝ 2025 թվականի հունվարից մինչև 2026 թվականի հունիսն ընկած ժամանակահատվածում երկրում բանտարկյալների թիվն աճել է 43%-ով։ Ըստ նրա՝ որոշ քրեակատարողական հիմնարկներում արդեն իսկ գերազանցվել է սահմանված թույլատրելի խտությունը։
Հետևեք մեզ տելեգրամում
