Հայաստանը և Ադրբեջանը առաջիկայում կարող են անցնել երկկողմ առևտրի։ ՀՀ ԱԳ նախարար Արարատ Միրզոյանը Հանրային հեռուստաընկերությանը տված հարցազրույցում հայտնել է, որ հայկական ընկերությունները մոտ օրերս ապրանք կվաճառեն ադրբեջանական ընկերություններին։
Միրզոյանի խոսքով՝ արդեն իսկ ադրբեջանական ընկերությունները հայկական արտադրողներից ապրանք են ձեռք բերել, իսկ այժմ նախատեսվում է նաև Հայաստանից Ադրբեջան ապրանքների վաճառք։ Նա նշել է, որ հոկտեմբերին նախատեսվում է նաև հայ և թուրք գործարարների հանդիպում։
Խոսելով Հայաստանի երկաթուղային ենթակառուցվածքի մասին՝ Միրզոյանը հայտնել է, որ քննարկվում է դրա կառավարման հետ կապված ռուսական իրավունքների ձեռքբերման հարցը։ Նա նշել է, որ Հարավկովկասյան երկաթուղու ցանցն ու շարժակազմը արդիականացման կարիք ունեն։ Հայկական կողմն այս հարցը քննարկել է ռուս գործընկերների հետ և առաջարկել է նրանց ունեցած իրավունքները փոխանցել Հայաստանին կամ երրորդ երկրի։
ԱԳ նախարարը անդրադարձել է նաև ՀԱՊԿ-ին և Ռուսաստանի հետ հարաբերություններին։ Նա նշել է, որ 2022 թվականի սեպտեմբերյան ռազմական բախումներից հետո Հայաստանը դիմել է Ռուսաստանին և ՀԱՊԿ-ին՝ օգնություն խնդրելով, սակայն անհրաժեշտ աջակցություն չի ստացել։ Միրզոյանի խոսքով՝ Հայաստանը չի պատրաստվում վերականգնել կամ ապասառեցնել իր մասնակցությունը ՀԱՊԿ-ին։ Միաժամանակ նա նշել է, որ Ռուսաստանի հետ պահպանվում են երկկողմ պայմանագրեր և պարտավորություններ, այդ թվում՝ պաշտպանական ոլորտում, սակայն ՀՀ-ՌԴ հարաբերությունները, նրա գնահատմամբ, վերանայման և առողջացման կարիք ունեն։
Հետևեք մեզ տելեգրամում
