Պերուն հայտարարել է Իրանի հետ դիվանագիտական հարաբերությունները խզելու որոշման մասին՝ Մերձավոր Արևելքում լարվածության հերթական սրման ֆոնին։ Այս մասին հայտնել է Պերուի Հանրապետության ԱԳՆ-ն։
Հաղորդագրության մեջ նշվել է, որ որոշումը կապված է երկրի արտաքին քաղաքականության առաջնահերթությունների, միջազգային իրավունքի և տարածաշրջանային իրավիճակի վերաբերյալ Պերուի դիրքորոշման հետ։
Պերուի իշխանությունները նշել են, որ մտահոգված են Իրանի ներքաղաքական իրավիճակով և վերջին շրջանում երկրում տեղի ունեցող զարգացումներով։ Հաղորդագրության մեջ անդրադարձ է կատարվել նաև Իրանի և Միացյալ Նահանգների միջև հարաբերությունների սրմանը և դրա հնարավոր հետևանքներին տարածաշրջանային ու միջազգային անվտանգության համար։
Պերուն առանձին մտահոգություն է հայտնել Հորմուզի նեղուցով միջազգային առևտրի և նավագնացության հետ կապված իրավիճակի վերաբերյալ։ Ըստ Պերուի՝ տարածաշրջանում շարունակվող լարվածությունը կարող է ազդեցություն ունենալ էներգակիրների շուկաների, գների և միջազգային մատակարարման շղթաների վրա։
Միաժամանակ Պերուն հայտնել է, որ Իրանի հետ հյուպատոսական կապերը կպահպանվեն։
Պերուի որոշման մասին Իրանի իշխանություններին պաշտոնապես տեղեկացվել է դիվանագիտական գրության միջոցով։ Փաստաթուղթը փոխանցվել է Էկվադորում Իրանի դեսպանատան միջոցով, որը նաև Իրանի՝ Պերուում հավատարմագրված դիվանագիտական առաքելությունն է։
Հետևեք մեզ տելեգրամում
