Դաղստանի Դերբենդի շրջանում Ադրբեջանի քաղաքացիների կողմից կազմակերպված անկարգությունների ընթացքում 4 ոստիկան է վիրավորվել։ Այս մասին հունիսի 16-ին հայտարարել է շրջանի ղեկավարի պաշտոնակատար Ֆուադ Շիխիևը։
Ըստ նրա՝ հարևան հանրապետության քաղաքացիները պահանջել են թույլ տալ նրանց անցնել ռուս-ադրբեջանական սահմանը: Ադրբեջանի քաղաքացիների ճամբարը գտնվում է Դերբենդի շրջանի Կուլար գյուղի մոտակայքում:
Շիխիևը նշել է, որ չարտոնված ճամբարում բախումից հետո բոլոր վիրավորված ոստիկանները հոսպիտալացվել են: Իրավախախտները վնասել են նաև ծառայողական մեքենան: «Ներկայումս բախումները դադարել են, բռնարարներին տեղափոխել են ոստիկանության բաժին», – ասել է շրջանի ղեկավարը:
Տարբեր աղբյուրների հաղորդմամբ՝ Ադրբեջանի 90-ից ավել քաղաքացի է ձերբակալվել։
Նշենք, որ Ադրբեջանի քաղաքացիները սպասում են սահմանի բացմանը, որը փակվել էր համաճարակի պատճառով: Սահմանը հատելու համար անձանց ցուցակը ձևավորում է ադրբեջանական կողմը: Հունիսի 15-ի երեկոյան ճամբարի բնակիչները վրդովված էին նոր ցուցակում իրենց անունների բացակայությունից:
Տեղի իշխանությունները նախատեսում են հանդիպում ունենալ Ադրբեջանի ներկայացուցիչների հետ և քննարկել իրավիճակը:
Կորոնավիրուսի համավարակով պայմանավորված Ռուսաստանը մարտի 27-ից դադարեցրել է կանոնավոր և չարթերային չվերթները այլ երկրների հետ, բացառություն են կառավարության որոշումներով նախատեսված հատուկ չվերթները, ինչպես նաև՝ արտերկրից քաղաքացիների վերադարձը կազմակերպող, նաև՝ բեռնափոխադրումներ, փոստային առաքումներ իրականացնող և հումանիտար օգնություն տեղափոխող չվերթները:
Հետևեք մեզ տելեգրամում
