Հայ և թուրք լրագրողների համատեղ մեդիա շրջայցի շրջանակում Դիարբեքիրում կայացել է հանդիպում Դիարբեքիրի համաքաղաքապետ Էմին Այի մասնակցությամբ։ Այս մասին հայտնում է Region Monitor-ը։
Ողջունելով Հայաստանից ժամանած պատվիրակությանը՝ Այը հանդիպումը գնահատել է որպես պատմական իրադարձություն՝ ընդգծելով քաղաքի բազմազգ անցյալն ու տարբեր համայնքների համատեղ կյանքի փորձը։
Անդրադառնալով տարածաշրջանի անցյալին՝ համաքաղաքապետը շեշտել է խաղաղության և ժողովուրդների միջև շփումների զարգացման կարևորությունը։
«Այս տարածաշրջանում շատ մեծ ողբերգություններ են եղել։ Համոզված եմ, որ այդ բոլոր ցավերին ամենաիմաստալից պատասխանը խաղաղության, եղբայրության և կապերի զարգացումն է»,- նշել է Այը։
Նա հույս է հայտնել, որ հանդիպումը կնպաստի ժողովուրդների միջև հարաբերությունների ամրապնդմանը։ Նրա խոսքով՝ տեղական իշխանությունները պատրաստ են իրենց իրավասությունների շրջանակում նպաստել այդ կապերի ամրապնդմանը։ Նա ընդգծել է, որ համագործակցությունը պետք է զարգացնել ոչ միայն տնտեսական, այլև մյուս ուղղություններով։
«Ցանկանում ենք, որ Հայաստանից ժամանած պատվիրակության անդամներն Ամեդում իրենց զգան ինչպես սեփական տանը, սեփական քաղաքում»,- եզրափակել է քաղաքապետարանի ներկայացուցիչը։
Նշենք, որ մեդիա շրջայցն իրականացվում է Եվրոպական միության աջակցությամբ՝ «Աջակցություն Հայաստան–Թուրքիա կարգավորմանը. անդրսահմանային կապերի ընդլայնում» ծրագրով։ Ծրագիրն իրականացնում են Եվրասիա համագործակցություն հիմնադրամը, Հայաստանի արդյունաբերողների և գործարարների միությունը, Հրանտ Դինք հիմնադրամը և Թուրքիայի տնտեսական քաղաքականության հետազոտությունների հիմնադրամը՝ TEPAV-ը։
Հետևեք մեզ տելեգրամում
