Իրանի առևտրի զարգացման կազմակերպության ղեկավարի միջազգային հարցերով խորհրդական Միրհադի Սեյեդին հայտարարել է, որ Իրանի և ԵԱՏՄ-ի միջև ազատ առևտրի իրականացմամբ երկու կողմերի ապրանքների 80 տոկոսը փոխանակվելու է զրոյական սակագներով, հայտնում է Pars Today-ը:
«Իրանի և ԵԱՏՄ-ի միջև գործող համաձայնագիրը, որն ուժի մեջ է մտել 16 ամիս առաջ, արտոնյալ առևտրային համաձայնագիր է, ըստ որի` ԵԱՏՄ-ի 502, իսկ Իրանի՝ 382 անուն ապրանքի համար արտոնյալ սակագին է սահմանվել: Ընդունված որոշման համաձայն՝ որոշ ապրանքների մաքսային սակագները նվազել են, իսկ որոշներինը՝ զրոյացվել»,-ԵԱՏՄ-ի առաջին բացառիկ ցուցահանդեսի շրջանակներում անցկացված մամուլի ասուլիսի ժամանակ ասել է Միրհադի Սեյեդին:
«Անցած տարվանից արտոնյալ առևտրային համաձայնագիրն ուժի մեջ մտնելուց ի վեր՝ Իրանից Եվրասիա արտահանման ծավալն աճել է ավելի քան 80 տոկոսով: Այս համաձայնագիրը բխում է երկու կողմի շահերից»,-նշել է Սեյեդին:
«ԵԱՏՄ-ն շուկա է, որին մեր մրցակիցները հասանելիություն չունեն: Ուստի մեր տնտեսական ակտիվիստներն ու առևտրականները հեշտությամբ կարող են աշխատել այս շուկայում և երկու կողմերի առևտուրը ներկայիս 3.5 միլիարդ դոլարից հասցնել ավելի քան 30 միլիարդ դոլարի»-եզրափակել է Սեյեդին:
Հետևեք մեզ տելեգրամում
