Ռոհանին մուսուլման աշխարհին առաջարկել է սեփական «անտիդոլարը» ստեղծել

Իրանի Իսլամական Հանրապետության նախագահ Հասան Ռոհանին հայտարարել է սեփական կրիպտոդրամը ստեղծելու մտադրության մասին՝ ի հակակշիռ ամերիկյան դոլարի։ Մալազիայում իր ելույթի ժամանակ Ռոհանին մահմեդական երկրներին առաջարկել է ստեղծել մեկ միասնական թվային վճարային համակարգ, որը թույլ կտա ազատվել դոլարի և ԱՄՆ-ի գերիշխանությունից։

«Մուսուլմանական աշխարհը պետք է միջոցներ ձեռնարկի՝ ամերիկյան դոլարի և ԱՄՆ-ի դրամական ռեժիմի գերիշխանությունից ազատվելու համար», – նշել է Իրանի նախագահը։

Նրա խոսքով՝ ԱՄՆ-ի համար տնտեսական պատժամիջոցները այլ երկրների վրա իշխելու և վախեցնելու հիմնական միջոցն են, ուստի որպես հակակշիռ պետք է ստեղծել սեփական միասնական բանկային և դրամական համակարգը, որը արտոնություններ կսահմանի մասնակից երկրների համար։

Ուշագրավ է, որ նոյեմբերի վերջին նմանատիպ գաղափար էր հնչեցվել նաև Եվրամիությունում։ Եվրահանձնաժողովի փոխնախագահ Վալդիս Դոբրովսկիսը հայտարարել էր, որ Եվրամիությունն իր միասնական թվային համակարգը կգործարկի 2021թ․ վերջին։ Իսկ Եվրոպական կենտրոնական բանկի գործադիր խորհրդի անդամ Բենուա Կերեն նշել էր, որ դա թույլ կտա հաղթահարել Եվրոպայի կախվածությունը ԱՄՆ-ում կենտրոնացված միջազգային դրամական համակարգերից, ինչպիսիք են՝ Visa-ն, MasterCard-ը, Amazon-ը, Apple-ը և PayPal-ը։