Իսրայելի զինված ուժերը և ԱՄՆ կենտրոնական հրամանատարությունը (CENTCOM) մեկնարկել են համատեղ զորավարժություններ Իսրայելի Էյլաթ նավահանգստում: Այս մասին գրում է The Times of Israel –ը:
Աղբյուրի հաղորդմամբ՝ ԱՄՆ զինված ուժերի կենտրոնական հրամանատարության շարքում ընդգրկվելուց ի վեր համատեղ օդածովային այս զորավարժություններն առաջին անգամ են անցկացվում: Ավելի վաղ Իսրայելն ԱՄՆ զինված ուժերի եվրոպական հրամանատարության (EUCOM) անդամ էր:
«Երկու երկրների զինված ուժերը կիրականացնեն զանազան վարժանքներ, որոնց ընթացքում կմարզվեն հակաահաբեկչական, հատուկ նշանակության ուժերը՝ կիրառելով ռազմական տեխնիկան ինչպես բաց տարածություններում, այնպես էլ քաղաքային միջավայրում»,- նշել է Իսրայելի պաշտպանության նախարարությունը:
Համատեղ զորավարժությունները տևելու են երկու շաբաթ, որոնց կմասնակցեն 500 ամերիկացի զինվորականներ:
Նշենք, որ օգոստոսին Իսրայելի ԶՈՒ-ն և ԱՄՆ կենտրոնական հրամանատարությունն առաջին համատեղ օդային զորավարժություն են անցկացրել F-35 կործանիչների մասնակցությամբ:
Հետևեք մեզ տելեգրամում
