Լիբանանի տեղեկատվության նախարար Ժորժ Կորդահին հաստատել է, որ դեկտեմբերի 3-ին մտադիր է հրաժարական տալ, գրում է Al Arabiya-ն:
Դեկտեմբերի 2-ին կայացած մամլո ասուլիսի ժամանակ Կորդահին հայտնել է, որ այս որոշումը «դաշնակիցների հետ խորհրդակցության արդյունքում է ի հայտ եկել»:
Կորդահիի հրաժարականի վերաբերյալ լուրերը տարածվեցին վարչապետ Նաջիբ Միկաթիի հետ հանդիպումից անմիջապես հետո: Վարչապետին մոտ կանգնած աղբյուրները հաստատում են, որ Միկաթին ընդունել է Կորդահիի հրաժարականը:
Լիբանանյան ԶԼՄ-ների հաղորդմամբ՝ Կորդահին հրաժարականից առաջ հանդիպել է նաև նախագահ Աունի հետ:
Հաղորդվում է նաև, որ «Մարադա շարժում» կուսակցությունը, որին կառավարությունում ներկայացնում էր Կորդահին, նախարարի պաշտոնում արդեն նոր թեկնածուի է դիտարկում: Իսկ կրթության նախարար Աբաս Հալաբին կնշանակվի որպես տեղեկատվության նախարարի ժամանակավոր պաշտոնակատար՝ մինչև նոր պաշտոնյայի նշանակումը:
Նշենք, որ Aljazeera-ին տված հարցազրույցում Ժորժ Կորդահին քննադատել էր Սաուդյան Արաբիայի քաղաքականությունը Եմենի պատերազմում: Նրա հայտարարությունից անմիջապես հետո Սաուդյան Արաբիան հետ կանչեց իր դեսպանին Բեյրութից և պահանջեց, որ Լիբանանի դեսպանն էլ հեռանա Ռիյադից: Դիվանագիտական ճգնաժամը ավելի խորացավ, երբ ի աջակցություն Սաուդյան Արաբիայի՝ Պարսից ծոցի որոշ երկրներ նույնպես հետ կանչեցին իրենց դեսպաններին:
Կորդահիի հրաժարականը կարող է նպաստել Պարսից ծոցի երկրների հետ դիվանագիտական ճգնաժամի լուծմանը, քանի որ, ինչպես հաղորդում են լիբանանյան ԶԼՄ-ները, Ռիյադ կատարվելիք պաշտոնական այցի շրջանակներում Ֆրանսիայի նախագահ Մակրոնը քննարկելու է նաև այս ճգնաժամը:
Հետևեք մեզ տելեգրամում
