Սաուդյան Արաբիայի թագաժառանգ Մուհամմադ բըն Սալմանը դեկտեմբերի 9-ին այցելել է Կատար, որտեղ հանդիպել է էմիր Թամիմ բըն Համադ Ալ-Թանիի հետ:
Հանդիպումից հետո կողմերը հանդես են եկել համատեղ հայտարարությամբ, համաձայն որի շարունակելու են երկկողմ համագործակցությունը ինչպես ռազմական, այնպես էլ տարբեր ոլորտներում:
Կատարի Էմիրը նշել է, որ Սաուդյան Արաբիայի թագաժառանգի այցը շատ կարևոր է երկկողմ հարաբերությունների ակտիվացման և խորացման համար:
Մուհամմադ Սալմանը իր հերթին կարևորել է երկու երկրների միջև պատմական և «եղբայրական» հարաբերությունները՝ հույս հայտնելով, որ իր այցը կնպաստի երկկողմ համագործակցության ընդլայնմանը:
Բացի այդ կողմերը քննարկել են նաև տարածաշրջանային մի շարք զարգացումներ, մասնավորապես ողջունել են Իրաքում խորհրդարանական ընտրությունների անցկացումը, կարևորել Սիրիայում ճգնաժամի քաղաքական լուծման անհրաժեշտությունը և կոչ արել Լիբանանին իրագործել բարեփոխումները:
Նշենք, որ դեկտեմբերի 7-ին Սաուդյան Արաբիայի թագաժառանգը այցեր է կատարել Պարսից ծոցի երկրներ՝ սկզբում մեկնելով Օման, ապա ԱՄԷ, Կատար, Բահրեյն և դեկտեմբերի 10-ին՝ Քուվեյթ:
Հիշեցնենք, որ 2017թվականի Կատարի դիվանագիտական ճգնաժամից հետո Սաուդյան Արաբիայի թագաժառանգն առաջին անգամ է այցելում Կատար: 2017թվականի հունիսի 4-ին Սաուդյան Արաբիան և իր արաբ դաշնակիցները էմբարգո էին կիրառել Դոհայի նկատմամբ` Կատարին մեղադրելով իսլամիստ մի շարք խմբերին (օրինակ՝ «Մուսուլման եղբայրներին») աջակցություն ցուցաբերելու մեջ: Ճգնաժամը լուծվել է միայն ընթացիկ տարվա հունվարին:
Հետևեք մեզ տելեգրամում
