Իրանի քաղաքացիական ավիացիայի կազմակերպությունը հայտարարել Է, որ «Ուկրաինայի միջազգային ավիաուղիներ» ընկերության Boeing 737-ը խոցվել Է «երկիր-օդ» դասի փոքր հեռահարության երկու հրթիռով, որոնք արձակվել Էին «Տոր-Մ1» զենիթահրթիռային համալիրից:
Այդ մասին հունվարի 21-ին հայտնել Է Bloomberg գործակալությունը՝ վկայակոչելով ողբերգության հետաքննության վերաբերյալ երկրորդ նախնական հաշվետվությունը:
Գործակալության տվյալներով՝ ուկրաինական Boeing-ի վրա հրթիռներն արձակվել Էին հյուսիսային ուղղությունից: Bloomberg-ը Իրանի կողմից անցկացված նախնական հետաքննության արդյունքների վերաբերյալ այլ մանրամասնություններ չի ներկայացրել:
Հիշեցնենք, որ հունվարի 8-ին «Ուկրաինայի միջազգային ավիաուղիներ» ընկերության Boeing 737 ինքնաթիռն աղետի Է ենթարկվել Թեհրանի օդանավակայանից թռիչքից հետո: Օդանավի կործանման հետևանքով զոհվել Է 176 մարդ, այդ թվում՝ Իրանի, Կանադայի, Ուկրաինայի, Շվեդիայի, Աֆղանստանի, Գերմանիայի և Մեծ Բրիտանիայի քաղաքացիներ:
Զոհերի մեծ մասը Կանադայի եւ Իրանի քաղաքացիներ են: Իրանի զինված ուժերի գլխավոր շտաբը հունվարի 11-ին տարածել Է հայտարարություն, որում ընդունել Է, որ ինքնաթիռը սխալմամբ խոցվել Է հակաօդային պաշտպանության հրթիռով:
Հետևեք մեզ տելեգրամում
