Սաուդյան Արաբիայի արտգործնախարար Ֆայսալ բըն Ֆարհան Ալ-Սաուդն արաբական որոշ պետությունների և Իսրայելի միջև հարաբերությունների կարգավորումը համարել է «շատ դրական զարգացում»:
«Դեռ Աբրահամյան համաձայնագրերի ստորագրումից առաջ մենք հույս ունեինք, որ դրանք նոր խթան կհանդիսանան տարածաշրջանում խաղաղության և ավելի լավ ստատուս քվոյի ուղղությամբ: Սակայն կարևոր է չմոռանալ, որ գլխավոր հարցը Պաղեստինի հիմնախնդիրն է»,- հայտարարել է սաուդցի դիվանագետը:
Արտգործնախարարն ընդգծել է, որ ներկայումս անհրաժեշտ է իսրայելցիներին և պաղեստինցիներին բերել բանակցությունների սեղան, որպեսզի հնարավոր լինի խոսել երկարաժամկետ խաղաղության և «երկու պետություն» սկզբունքի կիրառման մասին:
Նրա խոսքով՝ Իսրայելի հետ հարաբերությունների կարգավորումից շահելու են տարածաշրջանի բոլոր պետությունները թե՛ տնտեսապես, թե՛ անվտանգային առումով:
«Սակայն առանց Պաղեստինի հիմնախնդրի կարգավորման՝ ամեն ինչ փխրուն է և ցանկացած սրացման դեպքում կարող է փլուզվել»,- շեշտել է Ֆայսալ բըն Ֆարհանը:
Հետևեք մեզ տելեգրամում
