Բևեռլի Հիլզի քաղաքապետ Լիլ Բոսեն խստիվ դատապարտել է սոցիալական ցանցերում հայերի նկատմամբ ատելություն սերմանող թռուցրիկների տարածումը:
«Ես բազմիցս կրկնել եմ՝ ատելությունը տեղ չունի Բևեռլի Հիլզում կամ որևէ այլ վայրում: Ես միշտ մերժելու եմ դա, միշտ դեմ եմ արտահայտվելու դրան», – գրել է Բոսեն Facebook-ում հրապարակված գրառման մեջ:
Նշենք, որ հունվարի 28-ին ԱՄՆ-ում բնակվող հայերը Լոս Անջելեսում Ադրբեջանի հյուպատոսության դիմաց բողոքի ակցիա էին կազմակերպել՝ Բաքվի կողմից Արցախի անօրինական շրջափակման համար բողոքի ձայն բարձրացնելով:
Երբ ցուցարարները մոտեցել են Ադրբեջանի հյուպատոսությանը, նկատել են փողոցի լուսացույցերի վրա փակցված հակահայկական պաստառները՝ հետևյալ գրություններով. «Ադրբեջան+Թուրքիա+Պակիստան+ Իսրայել = 4 եղբայրներ, որոնք Հայաստանը կջնջեն քարտեզի վրայից: Ինշալլահ»:
Բևեռլի Հիլզի ոստիկանական բաժանմունքն անմիջապես հետաքննություն է սկսել՝ ուսումնասիրելով Լա Սիենեգա և Ուիլշիր բուլվարների շուրջ տեղադրված հսկող տեսախցիկների տեսագրությունները՝ պատասխանատուներին փնտրելու համար:
Հետևեք մեզ տելեգրամում
