ԵՐԻՏԱՍԱՐԴ ՓՈՐՁԱԳԵՏ

Region Monitor-ը հայտարարում է վերլուծական հոդվածների կանչ՝ յուրահատուկ հնարավորություն ընձեռելով արևելագիտության, քաղաքագիտության, միջազգային հարաբերությունների, կովկասագիտության, լրագրության և հարակից բաժիններում սովորող բոլոր ուսանողներին, որոնք հետաքրքրված են տարածաշրջանային զարգացումների ուսումնասիրությամբ, վերլուծությամբ և փնտրում են հարթակ սեփական մասնագիտական կարծիքը լսելի դարձնելու և փորձառություն ձեռք բերելու համար։

Վերլուծական հոդվածները պետք է վերաբերեն Հարավային Կովկասի և Մերձավոր Արևելքի երկրների արտաքին և ներքին քաղաքական, ռազմական, սոցիալ-տնտեսական, մշակութային և ժողովրդագրական արդի խնդիրների քննությանը, տարածաշրջանային հակամարտությունների, աշխարհաքաղաքական գործընթացների ուսումնասիրությանը։

Ընթացիկ շրջափուլի համար առաջարկում ենք ուսումնասիրել հետևյալ թեմաները․

Թուրքիայի քաղաքականությունը Հյուսիսատլանտյան դաշինքին (ՆԱՏՕ) Շվեդիայի և Ֆինլանդիայի անդամակցության հարցի շուրջ։
Վրաստանի դիրքորոշումն ուկրաինական ճգնաժամի համատեքստում։
Ներքաղաքական գործընթացները Նախիջևանի Ինքնավար Հանրապետությունում։
Իրան-Հայաստան տնտեսական համագործակցության հիմնական ուղղությունները և զարգացման հեռանկարները։
Լիբանանի ներքաղաքական ճգնաժամի առանձնահատկությունները։

Ուսանողները սահմանափակված չեն միայն խմբագրության կողմից առաջարկվող թեմաներով, սակայն կարևոր է ուսումնասիրվող խնդրի արդիականությունը։

Հոդվածներն ընդունվում են հայերեն կամ ռուսերեն տարբերակներով։ Դրանցից հաջողվածները խմբագրության փուլը հաղթահարելուց հետո կհրապարակվեն կայքի «Երիտասարդ փորձագետ» բաժնում։ Հոդվածի վերջում անհրաժեշտ է նշել տեղեկատվական աղբյուրները։

Հոդվածների տեխնիկական չափանիշներն են․

Տառատեսակը՝ Sylfaen, տեքստի տառաչափը՝ 12, միջտողային հեռավորությունը՝ 1,15։
Հոդվածի սկզբում վերնագիրը՝ գլխատառերով։
Հոդվածի վերջում հեղինակի անուն ազգանունը, տարիքը, ուսումնառության վայրը (համալսարան, ֆակուլտետ, ամբիոն, կուրս), էլեկտրոնային հասցեն, հեռախոսահամարը։
Հոդվածի ծավալը՝ A4 ֆորմատի մինչև 3 էջ։

Հոդվածների առաջին խումբն ընդունվում է մինչև մարտի 15-ը։ Հարցերի դեպքում կարող եք գրել, ինչպես նաև հոդվածներն ուղարկել [email protected] էլեկտրոնային հասցեին։