Ամերիկացի հայտնի տիեզերագնաց Գարեթ Ռեյզմանը հրաժարվել է մասնակցել Բաքվում կայանալիք Միջազգային տիեզերագնացության կոնգրեսին։ Այս մասին նա մի քանի գրառում է արել Twitter-ի իր միկրոբլոգում՝ արձագանքելով Բաքվում անցկացվելիք կոնգրեսին մասնակցելու վերաբերյալ Տիեզերագնացության միջազգային ֆեդերացիայի հայտարարությանը (IAF):
«Ինչո՞ւ է Միջազգային տիեզերագնացության կոնգրեսն (IAC) անցկացվում Ադրբեջանում․ մի երկիրում, որն իր հարևան Հայաստանի դեմ ռազմական վերջին ագրեսիան իրականացնելու պատասխանատուն է: Ադրբեջանն ամենակոռումպացված երկրներից է, որն ունի Եվրոպայում մարդու իրավունքների ամենավատ ցուցանիշներից մեկը:
Ես չեմ գնալու կոնգրեսին, եթե դու գնում ես, խնդրում եմ, հաշվի առ այս ամենը»,- գրել է նա:
Ռեյզմանը նաև տեղադրել է Freedom House-ի, «Լրագրողներ առանց սահմանների», «Թրանսփարենսի ինթերնեյշնլ»-ի զեկույցները:
Նա հիշեցրել է, որ Եվրախորհրդարանը դատապարտել է Ադրբեջանի կողմից իրականացված սեպտեմբերյան ռազմական ագրեսիան՝ ավելացնելով, որ մամուլի ազատության ինդեքսով Ադրեբջանը դասվում է 154-րդ հորիզոնականում 180 երկրների շարքում:
Ռեյզմանն իր գրառման մեջ նշել է նաև, որ Ադրբեջանն աշխարհի ամենակոռումպացված երկրների շարքում է դասվում՝ զբաղեցնելով 128-րդ տեղը 154 երկրների շարքում:
Հետևեք մեզ տելեգրամում
