Աշխարհում արագորեն տարածվող մահացու կորոնավիրուսի պատճառով Թուրքիան ժամանակավորապես դադարեցրել է օդային հաղորդակցությունը ևս 3 երկրների հետ։
Թուրքիայի առողջապահության նախարար Ֆահրեթթին Քոջան հայտարարել է, որ մարտի 1-ից դադարեցվում են Թուրքիայի և Իտալիայի, Թուրքիայի և Իրաքի, Թուրքիայի և Հարավային Կորեայի հետ բոլոր ուղևորատար չվերթները։ Մեքենաների և մարդկանց համար երկկողմանիորեն փակվել է նաև Իրաքի հետ ցամաքային սահմանը։
Ավելի վաղ Թուրքիան դադարեցրել էր ուղևորափոխադրումը նաև համաճարակի աղբյուր Չինաստանի և հարևան Իրանի հետ, որտեղ կորոնավիրուսով պայմանավորված մահվան դեպքերի թիվն այսօր արդեն հասել է 66-ի։ Իրանի և Թուրքիայի միջև դադարեցվել է նաև ցամաքային և երկաթուղային հաղորդակցությունը։
Առանձին հայտարարությամբ են հանդես եկել նաև թուրքական «Türk Hava Yolları» և
«Pegasus» ավիաընկերությունները։ Առաջին ընկերությունը հայտարարել է, որ դեպի նշված երկրներ և այդ երկրներից Թուրքիա թռիչքները կդադարեցվեն առնվազն մինչև մարտի 10-ը։ Իսկ «Pegasus»-ը նշված ուղղություններով թռիչքներ չի իրականացնի մինչև մարտի 16-ը։
Նշենք, որ մայրցամաքային Չինաստանի հետ ավիահաղորդակցությունը Թուրքիան չի վերականգնի առնվազն մինչև մարտի 29-ը։ Միևնույն ժամանակ, Հոնկոնգի հետ ավիափոխադրումները շարունակվում են։
Հետևեք մեզ տելեգրամում
