«Օտարերկրյա լրագրողների իրավունքները պետք է պաշտպանվեն». Վրաստանի նախագահը՝ ադրբեջանցի լրագրողի արտահանձման մասին

Վրաստանի նախագահ Սալոմե Զուրաբիշվիլին անդրադարձել է Թբիլիսիում ձերբակալված ադրբեջանցի լրագրող Աֆղան Սադիգովի միջադեպին:

«Ի դեպ, նման խնդիր կա նաև մի շարք ուկրաինացի և ռուս լրագրողների համար: Նրանք դժվարություններ ունեն մուտք գործելու և մնալու համար: Հարցի վերջնական մանրամասները չգիտեմ, բայց շատ ցավալի է, երբ դա վերաբերում է լրագրողին:

Լրագրողների և օտարերկրյա լրագրողների իրավունքները պետք է պաշտպանվեն: Մեր երկրի համբավը կախված է դրանից»,- ասել է Վրաստանի նախագահը:

Նշենք, որ օգոստոսի 3-ին Թբիլիսիում ձերբակալվել է Azel.Tv լրատվամիջոցի գլխավոր խմբագիր Աֆգան Սադիգովը։ Նախատեսվում է նրա արտահանձնումը Ադրբեջանին: Վրաստանի ՆԳՆ-ն հայտնել է, որ Սադիգովը Ադրբեջանի կողմից հետախուզվում էր սպառնալիքների և շանտաժի հետ կապված հանցագործությունների համար։ Սադիգովի ընտանիքը ձերբակալությունը կապել է Իլհամ Ալիևի կառավարության կողմից քաղաքական հետապնդումների հետ։

Հավելենք, որ Amnesty International-ը ևս կոչ է արել Սադիգովին չարտահանձնել Ադրբեջանին։