Սեպտեմբերի 4-ին Եգիպտոսի նախագահ Աբդել Ֆաթթահ ալ-Սիսին մեկնելու է Թուրքիա, որտեղ հանդիպելու է թուրք բարձրաստիճան պաշտոնյաների հետ, այդ թվում Ռեջեփ Թայիփ Էրդողանի հետ։
Ավելի վաղ Թուրքիայի նախագահը 12 տարվա դադարից հետո առաջին անգամ մեկնել էր Եգիպտոս։ Կահիրե կատարած նրա այցը պայմանավորված էր երկու երկրների միջև հարաբերությունների կարգավորմանը միտված փորձով։
Նշվել է, որ երկու նախագահները քննարկելու են տարածաշրջանային մի շարք խնդիրներ, ադ թվում Գազայի, Լիբիայի և Սոմալիի խնդիրները։
Թուրքական այլ լրատվամիջոցներ տեղեկացրել են, որ այցի ընթացքում կայանալու է Թուրքիա-Եգիպտոս բարձր մակարդակի համագործակցության նիստ, որի շրջանակներում Թուրքիան Եգիպտոսին մատակարարելու է հարվածային ԱԹՍ-ներ։
Քննարկվելու է նաև երկկողմ առևտրաշրջանառությունը 10 մլրդ-ից 15 մլրդ հասցնելուն միտված ծրագրեր:
Հիշեցնենք, որ երկու երկրների միջև լարվածությունը սկիզբ էր առել 2013-ի ամռանը Եգիպտոսում «Մուսուլման եղբայրներ»-ին քաղաքական իշխանությունից հեռացնելու հարցում Թուրքիայի դիրքորոշման և այդ երկրի ներքին գործերին միջամտելու Անկարայի քաղաքականության պատճառով: Դրան հաջորդել էր Թուրքիայի և Եգիպտոսի միջև դիվանագիտական հարաբերությունների մակարդակի նվազեցումն ու դեսպանների հետկանչը։
Հետևեք մեզ տելեգրամում
