Վրաստանի Կենտրոնական ընտրական հանձնաժողովը չեղարկել է նոր խորհրդարան անցած ընդդիմադիր «Միասնություն-ազգային շարժման», «Հանուն փոփոխությունների կոալիցիայի» և «Ուժեղ Վրաստանի» կուսակցական ցուցակները։ Նշված ուժերն այլևս պատգամավորական մանդատներ չունեն։
ԿԸՀ-ի որոշումը որոշումը՝ կապված ցուցակների չեղարկման հետ, չի նշանակում, որ ընտրական վարչությունը կիսում է ընտրությունների վերաբերյալ կուսակցությունների գնահատականները։ Հանձնաժողովն առաջնորդվել է բացառապես Վրաստանի ընտրական օրենսդրությամբ։
ԿԸՀ-ն անհիմն է անվանել հոկտեմբերի 26-ի խորհրդարանական ընտրությունների և ամփոփիչ արձանագրության վերաբերյալ այս կոալիցիաների տված գնահատականը, թե իբր ընտրությունները կեղծվել են։
«Մենք կարծում ենք, որ այդ գնահատականները հիմնված են քաղաքական օրակարգի վրա և չեն արտացոլում իրականությունը: ԿԸՀ-ն ընդգծում է, որ 2024 թվականի հոկտեմբերի 26-ին Վրաստանի խորհրդարանի ընտրություններն անցել են Վրաստանի Սահմանադրությամբ ամրագրված սկզբունքներին համապատասխան»,-ասված է հայտարարության մեջ։
Իշխող «Վրացական երազանք» կուսակցությունը խորհրդարանում ստացավ 89 մանդատ, ինչը նրան հնարավորություն տվեց առանց ընդդիմության աջակցության ճանաչել ընտրված բոլոր 150 պատգամավորների լիազորությունները, ինչպես նաև ընտրել օրենսդիր մարմնի նախագահին, փոխնախագահներին և հանձնաժողովների ղեկավարներին։
Խորհրդարան մտած բոլոր ընդդիմադիր կուսակցությունների ղեկավարները պնդում են, որ 11-րդ գումարման խորհրդարանը ոչ լեգիտիմ է և նրա կայացրած բոլոր որոշումները նույնպես լեգիտիմ չեն։
Հետևեք մեզ տելեգրամում
