ԱՄՆ բարձրաստիճան պաշտոնյաները Դամասկոսում հանդիպելու են Սիրիայի նոր ղեկավարներին

ԱՄՆ նախագահ Ջո Բայդենի վարչակազմի բարձրաստիճան դիվանագետները դեկտեմբերի 20-ին Դամասկոսում կհանդիպեն Սիրիայի նոր իշխանությունների՝ «Հայաթ Թահրիր ալ-Շամ»-ի (HTS) ղեկավարության հետ։ Այս մասին ասել է Պետքարտուղարության մամուլի խոսնակ Մեթյու Միլլերը։

Խոսնակը նշել է, որ դա ԱՄՆ-ի և Սիրիայի դե-ֆակտո նոր կառավարիչների առաջին անձնական և պաշտոնական հանդիպումն է։

Պատվիրակության կազմում են Պետքարտուղարության Մերձավոր Արևելքի բարձրաստիճան դիվանագետ Բարբարա Լիֆը, նախագահի պատանդների հարցերով բանագնաց Ռոջեր Քարսթենսը և նորանշանակ ավագ խորհրդական Դենիել Ռուբինշտեյնը։

Իրենց հանդիպումներում ԱՄՆ պաշտոնյաները HTS-ի ներկայացուցիչների հետ կքննարկեն մի շարք սկզբունքներ, ինչպիսիք են ներառականությունը և փոքրամասնությունների իրավունքների հարգումը, որոնք Վաշինգտոնը ցանկանում է ներառել Սիրիայի քաղաքական անցումային գործընթացում։

Պատվիրակությունը նաև կաշխատի նոր տեղեկություններ ձեռք բերել ամերիկացի լրագրող Օսթին Թայսի մասին, ով գերի էր ընկել 2012 թվականի օգոստոսին Սիրիայում ռեպորտաժ անելու ժամանակ, և ԱՄՆ-ի այլ քաղաքացիների մասին, ովքեր անհետացել էին նախկին նախագահ Բաշար ալ-Ասադի ռեժիմի ժամանակ:

Ամերիկացի պաշտոնյաներն անմիջականորեն կշփվեն նաև Սիրիայի ժողովրդի հետ, քաղաքացիական հասարակության անդամների, ակտիվիստների, տարբեր համայնքների անդամների հետ՝ իմանալու նրանց տեսլականը երկրի ապագայի վերաբերյալ, և թե ինչպես Միացյալ Նահանգները կարող է աջակցել։