Վաշինգտոնում կայացել է Թուրքիայի արտաքին գործերի նախարար Հաքան Ֆիդանի ու ԱՄՆ պետքարտուղար Մարկո Ռուբիոյի հանդիպումը։ Թուրքական Anadolu գործակալությունը, հղում անելով դիվանագիտական աղբյուրներին, նշել է, որ քննարկվել են թուրք-ամերիկյան հարաբերությունները, ինչպես նաև տարածաշրջանային հարցեր, այդ թվում Սիրիայի, Ուկրաինայի, Գազայի խնդիրը, ինչպես նաև Ադրբեջանի ու Հայաստանի միջև ընթացող խաղաղության շուրջ բանակցությունները։
Պետքարտուղարության տարածած հաղորդագրության համաձայն՝ Ռուբիոն Թուրքիային խնդրել է աջակցել Ուկրաինայում և Հարավային Կովկասում խաղաղության հաստատման հարցում։ Նա բարձր է գնահատել Թուրքիայի դերը «Իսլամական պետության»-ը հաղթելու միջազգային կոալիցիայում և վերահաստատել է սերտ համագործակցության անհրաժեշտությունը՝ աջակցելու կայուն, միասնական, խաղաղ Սիրիային։
Մարկո Ռուբիոն նաև նշել է երկկողմ առևտրի վերջին զարգացումները և խրախուսել է ավելի մեծ տնտեսական գործընկերության առաջընթացը:
Վերջում, պետքարտուղարը մտահոգություն է հայտնել Թուրքիայում վերջերս տեղի ունեցած ձերբակալությունների և բողոքի ցույցերի վերաբերյալ։
Հետևեք մեզ տելեգրամում
