Ադրբեջանը, ըստ ամենայնի, շարունակելու է վարել Իրանին դիվանագիտական և տնտեսական առումով տարածաշրջանում մեկուսացնելու ռազմավարություն։ Նմանօրինակ միտք է տեղ գտել Անկարայի ճգնաժամի և քաղաքականության հետազոտական կենտրոնի կայքում օրերս հրապարակված հոդվածում, որը վերաբերում է Իրան-Ադրբեջան հարաբերությունների վերջին զարգացումներին։
Էրգյուն Մամեդովի վերլուծության համաձայն՝ Ադրբեջանն Իրանի հետ հարաբերություններում հետևում է բալանսավորման ռազմավարության՝ հաշվի առնելով և՛ իր տնտեսական անկախությունը, և՛ աշխարհաքաղաքական շահերը։
Իրան-Ադրբեջան բարձր մակարդակի վերջին հանդիպումներին ու բազմոլորտ պայմանագրերի ստորագրման հարցերին անդադառնալուց հետո հոդվածի հեղինակն ուշադրություն է հրավիրել 2025թ․-ի առաջին եռամսյակում մասնավորապես Իտալիայի (43.8%) և Չինաստանի (37.4%) հետ Ադրբեջանի արտաքին առևտրի աճին։ Փորձագետն ուշադրություն է հրավիրել դրան որպես Ադրբեջանի՝ ոչ միայն Արևմուտքին, այլև Ասիային Իրանը շրջանցող նոր տնտեսական գծերով կապվելու նպատակի մաս։
«ԱՄՆ-ի հետ ընդհանուր առևտրի նվազման պայմաններում Ադրբեջանի՝ ԱՄՆ ուղղված արտահանման 27.3%-ով աճը ցույց է տալիս, որ Բաքուն հավատարիմ է մնում Արևմտյան դաշինքում իր դիրքը պահպանելու և Իրանի մեկուսացումը խորացնելու ռազմավարությանը»,-ընդգծվել է հոդվածում։
Իսրայելի վարչապետ Բենյամին Նեթանյահուի՝ Բաքու պլանավորված և հետաձգված այցի, Թուրքիայի ու Իսրայելի միջև միջնորդական դեր խաղալու Ադրբեջանի քայլերի համատեքստում նշվել է, որ այդ քաղաքականությամբ և նաև Իսրայելի հետ ռազմական հարաբերությունները զարգացնելով՝ Ադրբեջանը մարտահրավեր է նետում Հարավային Կովկասում և Լևանտում Իրանի ազդեցությանը։
Հետևեք մեզ տելեգրամում
