Իսրայելի հարձակման հետևանքով զոհվել է Իրանի ԶՈՒ ԳՇ պետը

Tasnim-ի հաղորդմամբ․ «Հունիսի 13-ի վաղ առավոտյան Թեհրանում և Իրանի մի շարք այլ քաղաքներում լսվել են պայթյունների հզոր ձայներ։ Տեսանյութերն ու լուսանկարները վկայում են, որ հարվածներ են հասցվել Թեհրանի հյուսիսային, արևմտյան և կենտրոնական հատվածներում։

Իսրայելի պաշտպանության նախարար Իսրայել Կացը հայտարարել է, որ սկսվել է կանխարգելիչ գործողություն Թեհրանի դեմ։ Իսրայելի վարչապետ Բենիամին Նեթանյահուն հարձակումը որակել է աննախադեպ և հայտնել, որ նպատակ է եղել հարվածել Իրանի միջուկային օբյեկտներին։ Նա հավելել է, որ Իսրայելը մտել է իր պատմության որոշիչ փուլ և կոչ է արել բնակչությանը ցուցաբերել համագործակցություն առաջիկա օրերին։

Պայթյունների ձայներ արձանագրվել են ոչ միայն Թեհրանում, այլև Քերմանշահում և Լորեստանում։ Թեհրանի Իմամ Խոմեյնի օդանավակայանում չվերթները ժամանակավորապես դադարեցվել են՝ անվտանգության նկատառումներից ելնելով։

Հարձակման հետևանքով զոհվել են Իսլամական հեղափոխության պահապանների կորպուսի գլխավոր հրամանատար գեներալ Հոսեյն Սալամին, Խաթամ ալ-Անբիայի կենտրոնական շտաբի հրամանատար գեներալ Ռաշիդն ու նրա որդին։ Բացի դրանից, զոհվել են նաև միջուկային հայտնի գիտնականներ Մոհամմադմեհդի Թեհրանչին և Ֆարիդուն Աբասին։

Իրանի զինված ուժերի խոսնակ գեներալ Շեքարչին հայտարարել է, որ ԶՈՒ-ը գտնվում են 100% պատրաստության մեջ և կարձագանքեն Իսրայելի հարձակմանը խիստ և ցավոտ կերպով։ ԶՈՒ գլխավոր շտաբը, ԻՀՊԿ-ն և ԱԳՆ-ն հանդես են եկել հայտարարություններով՝ նախազգուշացնելով Իսրայելին ծանր հետևանքների մասին։ Արտաքին գործերի նախարարությունը նշել է, որ ԱՄՆ-ը՝ որպես Իսրայելի հիմնական հովանավոր, պատասխանատու է հարձակման բոլոր հետևանքների համար։

Իսլամական Հանրապետության գերագույն առաջնորդ Ալի Խամենեին ուղերձով դիմել է ժողովրդին՝ հայտարարելով, որ սիոնիստական ռեժիմը կստանա իր հանցագործության արժանի պատիժը։ Նա վստահեցրել է, որ նահատակված հրամանատարների ու գիտնականների գործը անմիջապես շարունակվելու է։

Իրանի ՆԳ նախարարությունը կոչ է արել ժողովրդին պահպանել հանգստություն և տեղեկություններ ստանալ միայն պաշտոնական աղբյուրներից՝ խուճապից խուսափելու համար»։