ԼՂ-ից բռնի տեղահանվածների բնակարանային աջակցության ծրագիրը կընդլայնվի

Կառավարությունը նախատեսում է զգալի փոփոխություններ Լեռնային Ղարաբաղից բռնի տեղահանված ընտանիքների բնակարանային ապահովման ծրագրում։ Նոր նախագծով նախատեսվում է ընդլայնել շահառուների շրջանակը, պարզեցնել ընթացակարգերը և ստեղծել միջգերատեսչական հանձնաժողով՝ նախկինում մերժված դիմումները վերանայելու համար։

Նախագիծը մշակվել է ՀՀ աշխատանքի և սոցիալական հարցերի նախարարության կողմից՝ արձագանքելով իրավակիրառական պրակտիկայի ընթացքում ի հայտ եկած խնդիրներին։ Նախարար Նարեկ Մկրտչյանի խոսքով՝ ծրագիրը կբացվի բոլոր թիրախային խմբերի համար՝ անկախ ընտանիքի կազմից։

Նոր կարգավորումներով հանվում է բնակելի տների կառուցումը միայն լիցենզավորված կազմակերպությունների միջոցով իրականացնելու պարտադիր պահանջը, ներդրվում է նոր մեխանիզմ հողամասերի գնումը անմիջապես վաճառողին վճարելու եղանակով իրականացնելու համար։ Բացի այդ, բնակավայրերի ցանկը կընդլայնվի՝ 452-ի փոխարեն ընդգրկելով արդեն 611 համայնք, որտեղ շահառուները կկարողանան օգտվել 4 մլն դրամի աջակցությունից։

Նախագծով առաջարկվում է ծրագրի երկրորդ և երրորդ փուլերը սկսել 2025 թվականի հուլիսի 1-ից, իսկ դիմումների ընդունման վերջնաժամկետը սահմանվում է 2027 թվականի դեկտեմբերի 31-ը։