Դիմադրության ուժերի հանձնվելը հանուն Միացյալ Նահանգների, Իսրայելի և մի շարք արաբական պետությունների պահանջները բավարարելու համար չի ամրապնդի Լիբանանի ինքնիշխանությունը կամ վերջ չի դնի օկուպացիային: Այս մասին իր կողմնակիցներին ուղղված հեռուստատեսային ուղերձում հայտարարել է շիական «Հեզբոլլահ» շարժման գլխավոր քարտուղար շեյխ Նաիմ Քասեմը։
«Եթե մենք հանձնենք մեր զենքերը, Իսրայելի ագրեսիան չի դադարի, ուստի մենք երբեք չենք համաձայնի օկուպացիայի ստվերի տակ մեր զորքերը զինաթափելու որևէ ժամանակացույցի: Թող Իսրայելը նախ իրականացնի 2024 թվականի նոյեմբերի 27-ի հրադադարի համաձայնագիրը»,-ընդգծել է քաղաքական գործիչը:
Քասեմը անընդունելի է անվանել ամերիկյան ծրագիրը, որի համաձայն իսրայելական զորքերը պետք է դուրս բերվեին հարավային Լիբանանի իրենց վերահսկողության տակ գտնվող երեք տարածքներից, իսկ դրա դիմաց «Հեզբոլլահ»-ն իր զինանոցի 50%-ը պետք է փոխանցեր լիբանանյան բանակին։
«Մենք չպետք է համաձայնվենք այս թակարդին՝ ֆինանսական օգնություն ստանալու համար, հակառակ դեպքում մենք կդառնանք նրանց (ԱՄՆ, խմբ.) կամակատարները»,-ասել է նա։
Շիաների առաջնորդի հայտարարությունը հնչել է այն ժամանակ, երբ Լիբանանի կառավարության անդամները քննարկում են ոչ կառավարական խմբավորումների զինաթափման ծրագիրը՝ «բոլոր զենքերը բացառապես լիբանանյան բանակի ձեռքում կենտրոնացնելու նպատակով»։ Lebanon 24 լրատվական պորտալի փոխանցմամբ՝ Մերձավոր Արևելքի հարցերով ԱՄՆ հատուկ ներկայացուցիչ Թոմ Բարաքը Լիբանանի իշխանություններին 30 օր է տվել այս ծրագրի առաջին փուլն իրականացնելու համար։
Հետևեք մեզ տելեգրամում
